ذكرى على رصيف الماء

على ارصفةالنهر دورت ذكرى بماي
جبته من الطرف للثاني خميته
فتشت الكصب عن خلي ماموجود
ذاب ويه النوارس من عذوبيته
صحباني شكثر ماشفت وكت الضيج
موقلة وفه بس جرحي ضميته
لأن جرحي الي بس انه الاتحداه
من كد مااعزه بكلبي حطيته
ويعرفني الجرح من اغفه دون الاه
يحس بوحشه كلبي ويرفض امنيته
واتذكر كلامك يااعز مغرور
طاووس وعليه شكثر ماديته
ذلاني شكثر ماكتله خل ارتاح
ولافكره اجتني اترك عبوديته
اعتقني ابد ماكتله خاف يروح
عشر سنين كلبي بسجن حريته
احبه واعتقد للمثله ماينعاف
عافاني شكثر وانه الجنت بيته
من شفتك طحت سم جبدي التلكاك
شالك من وكعتك وانته سميته
شجالك غيرت كل الخصال شبيك
الشخص يصبح عدم لوفقد شخصيته
صح شكلك ورد بس مو ورد الهويت
الورد يصبح دغل لوخسر عذريته
لتكلي الزمن هو الخذاك بعيد
انته الي ردت هالدرب ومشيته
مالومك بعد الصار ماينعاد
قبلتك بالجرح بس كلبي النسيته
ايامك الك وايامي رهن ايام
شالن من عشرتك موت ورضيته
حقك من عفتني ماهويت تموت
عشت دوني حياة وكلبك عفيته
الك واهس شغلني من الصبا لليوم
والك قسوه وجرح كل عمري عانيته
بعد مااشتعل من كثر ماوجيت
انه بطرك الرماد الانته خليته