]قصائد وابوذيات ونعي لمولاتي رقيه ع اقول (386)

قصائد وابوذيات ونعي لمولاتي رقيه ع اقول
(386)
********
(1)
اكعد يابويه احجي وياي..ماريدن صدكني الماي
اعليك الزهره..اخر مره
اكعد يابويه احجي وياي
********
اكعد يابويه وحاجيني..ونشفهن دمعات اعيوني
متعوده عليكم يالوالي..بجلماتك بويه ترضيني
افراكك حيل محيرني..وبعدك يالغالي مبجيني
ماارهم من غيرك بويه..انت اعرف بيه وتدريني
انته الادره..بهاي السفره
اكعد يابويه احجي وياي
********
كل وكتي وياكم يابويه..اكظيه وياكم يالغالي
ماجنت اتوقع تتركني..ولا جانت يابويه ابالي
فاركتك والدمعه بعيني..ولو شايف شنهو بدلالي
حنيت لحضنك يابويه..من بعدك وشصار بحالي
بروحي الجمره..هل مستعره
اكعد يابوي احجي وياي
*********
اسهام البيكم ماترحم..شجن نص بيكم نص بيه
عدوانك لاذمه العدهم..لا رحمه وعطف وحنيه
خلوهه ادموع تتساكط..يابويه بلاذنب عليه
وخلوني يتميه بلا والي..مكسورة خاطر محنيه
طلع قهره..ابنت الزهره
اكعد يابويه احجي وياي
*********
اكعد يابويه وسولفلي..وخفف من كلبي الالام
واحجيلي يابويه شعندك..ماعندك عن الاقوام
هم بيهم من عذب طفله..وهم بيهم بويه ظلام
كلي عليهم من يامله..وهم بويه اعتنقو اسلام
فعله يدمره..اجهر كفر
اكعد يابويه احجي وياي
*********
راوني الماشفته بعني..ومابيهم من يرحم حال
اسياط وحبل وعطشني..ومصايبنه تهد اجبال
كل هذا تحملنه بويه..وشلنه الحمل الماينشال
اطفال وعمتي تباريهم..ونسوان وكلهم اطفال
كسرو ظهره..وماقل صبره
اكعد يابويه احجي وياي
*********
خادم اهل البيت
ابو علي السعيدي
&&&&&&&&&&&&&&&&&&&&&&&&&&&&&&
(2)
********
شوف المنظر..شوف المنظر
هاي احوالي..شوف المنظر
لاتتركني..تزيد وني
************
يابويه انه بنيتك..تتركني يالوالي صعب
ابكلبي يابويه حزن..وجماله دب بيه الرعب
شلون حالي ياشهم..وصعبه يفاركم محب
التفت بويه عالظعن..شمال شركي والغرب
ضايع الي ضايع الي..ابوي ضايع الي
لتضيعني..تزيد وني
************
تتركني بويه بدمعتي..ابيا حاله بويه يحسين
بنيتك يبويه وهايمه..عدمن تودعني زين
اطفال مثلي تيتمت..ماتدري روحتو لاوين
الدمع بعيوني جره..اليوم ونزل عل الخدين
هاي عيوني هاي عيوني..فدو الك هاي اعيوني
لاترعبني..تزيد وني
***********
احلام يابويه الي..واحلام جانت احلام
تعلب وياي بسجدتك..تضحكني بويه وتنام
انطر لجيتك يالولي..ايام من بعد ايام
والحلم طار بصفنتي..واعرفت اعيش اباوهام
بويه الولي بويه الولي..منتظرتك بويه الولي
لاتصفني..تزيد وني
**************
من رحت بويه للحرب..اعرفت ماكو رجعه
ابقيت بويه لوحدي..امفاركه شكد صعبه
يوميه يمي ماغبت..يسئل عليه طبعه
لاانته لاعمي شفت..لاصحبته ولا ربعه
فارك عيني فارك عيني..كل جسمك فارك عيني
لاتفاركني..تزيد وني
***********
لازم يابويه تودعني..ترحل يابويه تخليني
وتخبرني شنهو الصاير..دمعاتي اللي جرحت عيني
ليش الوالد لبنيته..بسرعه تحن يزي ونيني
لا يابويه لاتتركني..افراكك حيل يبجيني
نور عيوني نور عيوني..لا ترحل يانور عيوني
من تسألني ..تزيد وني
**********
خادم اهل البيت
ابو علي السعيدي
&&&&&&&&&&&&&&&&&&&&&&&&&&&&&&
(3)
الله يادمـعـة رقـيـه...تصرخ تنـادي عليـه
كوم وانهض يالموالـي...وجاوب انت عن سؤالي
وجاوب انت ال اميه
******************
الله يادمعـة رقـيـه....النزلت بيوم الطفوف
تنظر وشافت وليهـه...دارت اعليه السيوف
والسهم نابـت بكلبـه...ورهبة الموقف تشوف
حركو اخيمـه عليـه...وحايره ابين الصفوف
من عكب ذاك الدلال...تركب بظهر الجمال
وتصرخ تنادي سبيه
*******************
الله يادمعـة رقـيـــــــــــه...ياطهر هــاي الدمـوع
تنزل وتجري على خده...مــثل كطرات الشمـوع
صاحت بصوت الظليمه...ترفض الذل والخضوع
شاهد الدمعه الحزينــــه...خــــل تناطـره الجمـوع
شوف هذا اللي جرالي...والشمر يلعب بحالي
وشافت انواع الاسيه
******************
الله يادمـعـة رقـيــــــه...شاهده لمــــد العصـور
تبقى تغلي على المنابر...يبقى يذكرهـا الغيـور
ويبقى يذكرها الموالـي...شما حزن زار القبـور
تبقى هل الدمعه الحزينه...لحين ياوكت الظهـور
بيده يمسحه الامام...وبيد يسطر باللئام
واله يقدم هديه
****************
الله يادمعـة رقـيــــه...نـــــور باقـي لـلازل
حين يذكرها الموالي...تدمع بسرعه المقـل
ولو سمع اسمج رقيه...حيله ينهد لـو جبـل
باب من تدخل عليـه...تشوف مفتوحه السبل
هي الجنه والامان...في عهدنه وكل زمان
جنة الباري ونبيه
***************
الله يادمـعـة رقـيــــــــه...دمعت المــــاتت غريبـه
يوم شافت راس ابوهه...بحركه صاحت يامصيبه
شلون من بعدك يغالي...يارســــــول الله وحبيبـه
من رحت يابويه عني...الراح منـــي منين اجيبه
طلع صوت من اللسان...وهي ماتت بالمكان
يوم دركته المنيه
**************
الله يادمعـة رقــــــيـه...الباقيـــه عالخد تنـوح
تصرخ بصوت وتنادي...ريت بيـه هالجـروح
ولا شفت راسك يوالي...واشتم بعطرك يفـوح
جلمـه كالهـا اليـه...يوم حظنتني الـروح
كلمت راس الحسين...والدمع غرك العين
من شبح عينه عليه
************
خادم اهل البيت
ابو علي السعيدي
&&&&&&&&&&&&&&&&&&&&&&&&&&&&&&&&
(4)
جينه نتلكه السبيه .. جينه ننشد عن رقيه
**********
جينه ننشدهه العقيله.. درب رحلته الطويله.. شلون حالته العليله
شلون ياظلم ال اميه
************
شلون ظلمه حرمله..كام يحدي العايله..شعمل بيهه بكربله
ذوله اشرار البريه
**************
ذوله لاذمه وضمير..ذوله اصحاب السعير..شلون زينب من تسير
زينب الحره الابيه
************
سارت وسار الظعن..وتركته اشلون الوطن..بالنياحه والشجن
تصيح مهمومه وسبيه
************
تصيح زينب يااخوتي..المن احجي شكوتي..وينه حيدر رجوتي
شوف سوط ابن الدعيه
***********
عله ياعله البكلبي..عيوني عليكم التربي..بالدمع ياعيني صبي
اهوال راوتني الدنيه
***********
تبجي مهمومه رقيه..تصيح تبا لاال اميه..ذوله اشرار الدنيه
يوم وافته المنيه
*********
خادم اهل البيت
ابو علي السعيدي
&&&&&&&&&&&&&&&&&&&&&&&&&&&
(5)
رقيه تصرخ حسين...حزينه وتهمل العين
تنشد بالسبوهه...عن عمه وابوهه
يابويه رحت وين
***************
رقيه من نســل حره كريمــه
ابدا مـــــاذلت وضلت عظيمه
اهات وشــــجن نوح وهظيمه
نادة من ولوهه يابويه حريمه
نادت وين الاحرار...وينه حامي الجار
وينه حامي الدين
************
كــــــعدت والالم بين عليهه
مسافه والبعد وقيد البديهه
والحادي الحده لاهو وليهه
بـــس الالم شاركه بسبيهه
نادت راعي الدار...بصوت الغيره واصرار
انه اهلي الميامين
**************
عله صوت يحـــــره من طلــــــبتي
طيف لوالــــــــدج.يمه انتـــي جنتي
كالت هو يمـــــي.اسمــعيني يعمتي
باصرار وعزيمه صاحت ياهظمتي
من سمعوه الاشرار...وصلت الهم اخبار
عن عودج تسالين
*************
هاجت وانتــــــخت نادت بسرعه
وين احسين ابوي ويـــــن ربعه
وياعمي الكفـــيل وين درعــــــه
واخواني البقوا بالحومه صرعه
والله حير واحتار...الدنيه بسرعه تندار
شوف شيعمل البين
**********
جوع وخـــــوف وجماله سبيه
واهات وحــزن ون واذيـــــــه
شافت بالطشت ابن الزجـــــيه
ماتت هي بالحال مولاتي رقيه
تدري شبيه اشصار...كلبه من الحزن ثار
وماتوهمه الاثنين
*************
خادم اهل البيت
ابو علي السعيدي
&&&&&&&&&&&&&
&&&&&&&&&&&&&&&&&&&&&&&&&&&&&&&&&&
رقيه طالبه بمدرسة الاحزان.. ومدير المدرسه والدهه الحسين
ومعاون مدرسته البطل عباس..البترهن جفوفه وانطه العين
ومعلمت المدرسه زينب الحوراء..وتدرسه حصص يوميه حصتين
مراقب عل الصفوف الاكبر اليوم..يعرف باليغيب يروح لا وين
وياهه ادرست يمهه عليله.. فركهه النقل من دورت البين
غابت من درسه رقيه مرات..وكتبت بالطلب لن عدهه عذرين
اجازه من الدروس تريد للدوم..وتريد من العمر تتفرغ سنين
حلمت والحلم جان الهه كابوس..تشوف ارماح وغلال وسجاجين
وخيمه البيه تدرس احتركت بساع..وتشوف الهجمو عليه مجانين
فزعت من حلمه وشافت الصار..شافت واقعه والحدث بالحين
صاحت عمه زينب انت وياي..هم مثلي يعمه من تحلمين
شفت دم اخوتي وعمه والصار..وشفت هسه ابو الصار نصين
جسمه عالثره متوسد الكاع..وراسه بالطشت ياوسفه ياعين
خادم اهل البيت
ابو علي السعيدي

&&&&&&&&&&&&&&&&&&&&&&&&&&&
اولا.. بده العام الدراسي وعدنه غياب واسم الطالبه الغابت رقيه
ثانيا..ماعده كتب وغابت هل الايام محروكه الكتب بالغاضريه
ثالثا..عده طلب وتقدم لعباس عطشانه تريد من الفرات اشويه ميه
رابعا...عمه من سمع هذا الخبر راح وبعده عل النهر وي الزمزميه
خامسا..تقدمت بالاجازه وعدهه اعذار جيفنه اصبحت بلايه تجيه
سادسا..اخوه الراح عنه وبعد مارد ردلهه شهيد بسهم المنيه
سابعا..وعلي الاكبر اخوه الراح عشطان وي عبد الله اندفن صار سويه
ثامنا..تسئل عنه ابوهه الراح مارد وصاحت صوت يابويه سبيه
تاسعا..عمه ابو فاضل عل النهر صار وعمته العقيله الهاشميه
عاشرا..كرب عاشور وحل بيه الوداع ونادت عالكفرتندب رقيه
وداع وخاتمه بص صارو اثنين راس حسين وبنته الابيه
ماتت عالطشت وانتكتب اعلان فصل من قيدالحياة للجنه الزهيه
حيات الطالبه الدرست كتابين كتاب الباري واصحاب التقيه
خادم اهل البيت
ابو علي السعيدي

**************تصيح ابن الزجيه && بويه انه رقيه
رادت هيه ابوها && كوم المارعوها
ماكالو خطيه
------------------------------------
رقيه اتريد ابوها اوجابو الراس
تحط خده علخده وبجت النــــاس
تكله هنا يبويه اه ينومـــــــــــاس
ليش اتعوف بتك بيد الارجـــــاس
عفت بتك وحيده .. ليزيد وعبيده
هذا ابن الدعيه
------------------------------------
بويه انه العزيزه تنزف عيوني
خلوهه دمعتي تحرك جفوني
لون شفت الاثر يحسين بمتــــــــوني
يضربني وا صيحاً لا تضربوني
لون حسين موجود .. وعمي راعي الجود
مااشكف بديه
-------------------------------------
اخذني وياك بويه بهم تخلينــــــــــــي
وحيده والشمر بسوطه ياذينـــــــي
انه ابلياك اموت وانته تدرينـــــــــي
ياروحي وحياتي ونور البعيني
شفت يابويه الموت .. تبجي وصاحت بصوت
يبويه شلون بيه
--------------------------------
لاحنو عليه وكالو ازغيـــــــــــره
شبكت راس ابوها وظلت ابحيره
صاحت صوت بويه ياابو الغـــــيره
تدري اخلاف عينك اصبح اسيره
بيتك موحش اليوم .. وعليه زادت اهموم
وظاكت بعيني الدنيه
------------------------------------
شافت راس ابوها وكامت تصيح
وين اهلي اصبحو كلهم مذابيح
ماتت فوك راسه بدمعه تسبيح
شافها علي وعيونه اطيح

صاح بصوت عمه .. ماتت اختي يمه
مهمومه رقيه
-----------------------------------------
خادم اهل البيت
ابو علي السعيدي***