اليوم الثاني --- في حق العليله ----------

بسمه تعالى

سلام عليكم

--

--

--

وين ابسفركم وين -- اتودعني بويه حسين

فراگ الاهل ميهون -- وآنه عليله شلون

--

يهلي صعبه اتودعوني وآنه محتاجه الرعايه

روحي ماتحمل ألمها ومالي حيل اعله الرزيا

أخوتي همه حياتي همه سلوايه او منايه

عمري ماريده بعدهم خلها تاخذني المنايه

ابقه بحزن وهموم -- ما أگدر اصبر يوم

احبابي من يمشون -- وآنه عليله شلون

--

شصبر ويامهجه عندي تحمل اغياب الاحبهم

روحي بالدار او عيوني تبقه شباحه الدربهم

أخذوا آمالي او حياتي الچانت أمأمنه بگربهم

ميته لو راحوا اصّبح روحي ماتسوه عگبهم

صعبه الاحبه ايغيب -- وجرح البعد ميطيب

ابحالي اظن يدرون -- وآنه عليله شلون

--

بويه ماشي بكل أخوتي من يظل يابويه يمي

لا أخت لأا أخ بقالي لاتظل ويايه امي

حتى عمي بهل الضعينه رايح العباس عمي

وآنه من هالساعه حزني بيّه يكثر ويه همي

خيمت عليّه اهموم -- أسهر واعد انجوم

ابها الحاله شيگولون -- وآنه عليله شلون

--

بوايه بفراگك ونيني والنحيب اعليك ازيده

ويه بت مسلم اخذني طفله هم مثلي حميده

هذي كلفه اعله العليله مثلي لو ظلت وحيده

ابداري من اصبر واناطر للضعن سالم يعيده

خلي رقيه اوياي -- بيها اسّر عيناي

والوضعي لاتنسون -- وآنه عليله اشلون

--

شحسبت لمن عفتني هم گلت بنتي عليله

ونته ما گتلي يبويه سفرتي هاذي طويله

اطفي جمر امصاب گلبي ابيا قهر اطفي غليله

ودمعي يالغالي يبويه بيش انشفله مسيله

عبد الله هم اوياك -- لا بويه اترجاك

من اهلي ميظلون -- وآنه عليله شلون

--

من مشه ظعن اهلي مارد كل خبر منهم اليه

لاجت الروح الفگدهم هاجت آلامي عليه

ابدار آنه وعيني ظلت للدرب عيني ربيه

من بعدهم ماردتها الروحي واتمنه المنيه

ميته أنه اتمنيت -- وبداري لاظليت

احبابي ميعودون -- وآنه عليله اشلون

--
سيد عدنان الحمامي