يوم الثامن من محرم - -- للقاسم بن الحسن ع ---- للقاسم

يبن الحسن ردتك ذخر --- في حق القاسم ع

بسمه تعالى

سلام عليكم

---

المستهل

----

باريتك -- باريتك -- آيبني شگد باريتك

عني غفل يبني اتروح -- عريس ولمك مذبوح

آيبني شگد باريتك

-------

خل يبقه بجروحي الالم -- وخلي الدمع بيه ايخون

كون ابقه بثياب الحزن -- فگدك يجاسم ميهون

وانصب مآتم للعزه -- ولمك الناس ايعزون

اوحيّد وعن عيني غبت -- بحال امك اوليدي شلون

حاچيني -- حاچيني -- صبري انهدم حاچيني

والگلب مليان اجروح -- عريس ولمك مذبوح

-----------

يوليدي بالمصرع شفت -- هالشمعه وتبچيني

انظرها چنها اتكلمت -- اسمع الي اتحاچيني

يم جاسم اتگلي بعد -- صرتي بحزن طفيني

ساعتها گلب أمك وگع -- ماشوف بعد بعيني

يالغالي -- يالغالي -- دمع وألم يالغالي

ماينشف دمعي المسفوح -- عريس ولمك مذبوح

------

يبن الحسن ردتك ذخر -- يبني ترد تعب ارباي

مارحم دهري ولانصف -- گاصي الدهر يبني اوياي

امك تظل بس بالحزن -- ولافكري يبقه ولاراي

هم يرجع اوليدي الوكت -- تفرح بشوفك عيناي

ماشوفك -- ماشوفك -- صعبه بعد ماشوفك

يالماخذ اوياك الروح -- عريس ولمك مذبوح

----------

يوليدي ياتعب العمر -- ياسلوة امك جسام

باريتك ابروح الصبر -- اسهر واعد الايام

امدلل وحظن امك مهد -- ابحظني رغد يبني اتنام

چنت احلم بعرسك واظن -- يبني تدوم الاحلام

مادامت -- مادامت -- يافرحتي المادامت

بالحزن امك والنوح -- عريس ولمك مذبوح

------

وين الذي فگدت ظنه -- وين الذي عدها امصاب

خل تجي اتشاركني الحزن -- ونبچي دمه عالغياب

آني افگدت بالطف بدر -- آني افگدت اروع شاب

ماشفته من يمي مشه -- ولارجع عن عيني غاب

ودعني -- ودعني -- مارّد بعد ودعني

بالطف اظلن ماروح -- عريس ولمك مذبوح

--------

سيد عدنان الحمامي