تنادي الزچيه

(( تنادي الزچيه ))

تنـادي الزجيه ... شــــفت الأذيــه
عُكبــك يطاها ... لداري ســــباها
چني أجنبيه
***********
عُكبـك يبـويه الكَوم جــاروا علينه
حركَوهــا باب الدار أهل الضغينه
بعـدك يابـوأبراهيـم وليـــه نولينــه
ظلت تـوّن وتنـوح روحي الحزينه
محتاره بامري ... ودموعي تجري
لهاي الرزيه
************
من عملة البســـمار ضلعي تهشــم
محسن عله الأعتـاب طاح أوتكوّم
ماوجـدت ممشــــاي والعــالم إِظلم
من أرحلت لليـــوم عيـني تهـل دم
دلالي ذايب ... شلت المصايب
من الرعيه
************
عن كَبــرك الأنـذال بويـه بعِـدوني
ومن البواچي عليــك والله منِعوني
مـن المدينــه أنـــوب كَاموا نِفـوني
ألمن عُكب عيناك أشكي شــجوني
والله عجيبه ... صرت الغِريبه
ونتي خفيه
************
خـلافك علي الكرار ريتـك تنـظره
رحت وصفت دنياه ظلمه أومكدره
أبنارالحزن مصيوب وبكَلبه جمره
لـوله العهـد ويــاك شنهو اليـصبره
الموقف تشوفه ... ألكَيـّد چفوفه
أمر الوصيه
************
هالزمره يالمختــار نقضت عهدها
من عافت الكـرار ضيعت مجـدها
وأهل الســـقيفه أنذال ياهو اليردها
من فاركَت دنيــــاك صبت حقـدها
من أهل الضلاله ... حالتنه حاله
شفنا المنيه
************
جيت أشكي بالعبرات حال المصيبه
وكَلَبي بالحســـــــرات وجّـــر لهيبه
عُكبك عشـت أيام ســــوده وعصيبه
دنيـــــايه يالمختـــار وحشــه وكئيبه
من فاركتني ... ألمن عفتني
أصفچ بديه
************
بقلم / سـعد مطلوب الخفاجي