للعليله ... ظلمه ظلمه .. أصبح أبعيني نهاري

المستهل
.....
طللمه ظلمه ...أصبح بعيني النهار
ظلمه ظلمه ... بعدوا أهلي أمن الديار
طفله وزغيرعمرها ... جبل مايحمل صبرها
ظلمه ظلمه ...بعدوا أهلي أمن الديار
.....
يالضعن يالخذت روحي ... وين رايح بالاودهم ..لاتسافر
وآنه محتاجه المحنه ... ما أشم نسمه بعدهم .. گلبي حاير
بس جسد لانفس بيّه ... حيلي كله صار عدهم .. شنهي صاير
ربي يالنجيت يوسف ... بالسلامه ليه ردهم ... ونته قادر
حالي حالي ... چاليتيمه أبلا حنان
حالي حالي ... طفله وفگدت الامان
دهر كل يوم اليمرها ... جبل مايحمل صبرها
ظلمه ظلمه ...بعدوا أهلي أمن الديار
.....
راح ابويه حسين مني ... وراحت أحلامي اويه ضعنه .. شلون بيّه
وخل اليفارگ خليله ... اتظل حياته أبليه معنه .. للمنيه
هم بعد هالزمن هذا ... بدار ألاحباب او جمعنه .. نرد سويه
لونظل واحد للاخر ... نذكر ونهمل دمعنه .. وهاي هيه
أذكر اذكر .... وجه عبد الله أخوي
أذكر اذكر ... بحظنه من أگعد لبوي
رحله ماتعرف خبرها .... جبل مايحمل صبرها
ظلمه ظلمه .. بعدوا أهلي أمن الديار
.....
شلون الاكبر من أودعه ... غالي ابن أمي وأحبه .. وشغلاته
مدلله عنده بحنانه .... شگد حنين أعليه گلبه .. يحب خواته
چنت يوم الما اشوفه .... عيني بس تربي أعله دربه .. ياحلاته
من يجي بعطفه عليه ... شكبره اشعر الي حبه .. بكل حياته
خيّي خيّي .. بعد ماوجهك أشوف
خيّي خيّي ... وين رايح للطفوف
شوفته تجبر كسرها ... جبل مايحمل صبرها
ظلمه ظلمه ... بعدوا أهلي أمن الديار
.....
كل خواتي خذن حيلي ... سكنه ودعتني ورقيه .. دمعي يجري
وآنه عافيتي متسمح ... هالقهر لو صار بيه .. ضعف صبري
وحدي بالدار أمن افكر ... شلون من چنه سويه .. صعبه أدري
مطمئن گلبي ورقيه ... مچلچله وسكنه عليه .. بعد عمري
روحي روحي ... مني أخذنها الخوات
روحي روحي ... گمت اتمنه الممات
كل أخت چانت ذخرها .... جبل مايحمل صبر
ظلمه ظلمه .. بعدوا أهلي أمن الديار
.....
عمتي من ليّه اجتي ...صبري گالتلي يعمه .. كثر همي
القاسم بعينه يصدلي ... أجه يودعني أويه أمه .. وأجت أمي
كل أهل بيتي عليه ... فوگ راسي تصير لمه .. بحزن يمي
گمت للعباس عمي ... هوه حاظني واكلمه ... غالي عمي
عمي عمي ... علّه وفراگ شتهون
عمي عمي ... انتظر لمن تجون
بروحها ظمت قهرها ... جبل مايحمل صبرها
ظلمه ظلمه .. بعدوا أهلي أمن الديار
.....
وداعة ألله احباب گلبي ... خذتو من عيني ضواها.. وكل سنيني
علّتي ما غير انتم ... الها يحبابي دواها .. ياحنيني
بيش اشوفن بعد دربي ... أوداعكم عيني عماها .. طفت عيني
شلون أظل بالدار وحدي ... وروحي باريها خذاها .. من يجيني
ميته ميته ... گبل الموادع يريت
ميته ميته ... بعلتي لمن بگيت
مصايب أعليها شكبرها ... جبل مايحمل صبرها
ظلمه ظلمه .. بعدوا أهلي أمن الديار
....
سيد عدنان الحمامي