بعد منكول هذا فلان زين ويستحق مدحه؟الى من خان بلد الاولياء اقول

بعد مـنگول هـذا فـلان..زيـن ويستحـق مدحـه
لاان كلهه عصابه تبـوگ..وخطيه الـوادم مسنحـه
قدر عالشيعي صار الموت..ليـش الخارجـي يذبحـه
تعبنه وفاض بينـه الكيـل..والكيـل شكبـر طفـحـه
نريـد العيـد دوم ايصيـر..موبس فطر لـو اضـحي
وطنه الغالـي ياهالنـاس..للكـل صـدره امفتـحـه
تعالوا وشوفـوا هالايتـام..دمعهـه محـد يمسحـه
وتعالوا وشوفوا الحديثـات..نظرهه خايفـه اتشبحـه
الانترنـيـت طـلگنــاه..نتونـس علـى السبحـه
وعلى الدله سهرنه يطول..ودگ الهـاون ورحــه
بيهن كـل عليـل ايطيـب..وبيهـن عافيـه وصحـه
جزعنه من الشعر والگول..والهوسـات والـردحـه
وخلـي الطـابگ مغطـه..لا لتـبـوح وتفضـحـه
تدري انصابـت الاخـلاق..وسوك الطيب بـي شحـه
وتدري بدنيتـك مگلـوب..دوم المـايـل اترجـحـه
ظهريه النفـط منهـوب..ليـش انتانـي المنـحـه
والعالـم يشـوف الـوان..صور اجـرام متوضحـه
كـل ساعـه فضائـيـه..تبـث الخبـر وتصرحـه
ولو راد الوطـن ينهـض..يجي الارهـاب ويطيحـه
العراق ترابـه صايـر دم..والحـكـام متنـيـحـه
ومن امـه الولـد يطلـع..يرجـع دمـه مسبـحـه
ياذنـب الجنـاه ياصـوچ..بلكـي تگلـي وتوضحـه
كل شي بهالبلـد ممـرود..والطيـر انكسـر جنحـه
نشوف اوجوه موش اوجوه..اهلنه البالتعـب سمحـه
نشوف اغراب مدفوعيـن..لخراب الوطن مو صلحـه
من يعوض الصار اسنيـن..وجهـاد الوالـد وكدحـه
گضـت اعمارنـا بالظيـم..كلهه مصيحـه ومنيحـه
نفك باب السعـاده.. انريـدمشتـاگيـن للـفـرحـه


خادم اهل البيت
ابو علي السعيدي