يراعي البيت .......... قصيدة جديدة أربعينية

عندما رجع الركب الحسيني الى المدينة خاليا من الرجال والابطال لأحت ديار الحسين عليه السلام للسيدة زينب ع
فقالت مخاطبة الدار "

القصيدة بحر طويل ((طور حمزة الزغير شلون أنساك))


((مستهل))

يراعي البيت..... من طبيت
بيتك موحش أخلافك
************
يراعي البيت يالوالي .. والله وخوتك خوه
يبو صدر الوسع أنته .. وروحك تحمل أمروه
يزهي البيت بوجودك ... چان وشوفتك سلوه
جره فراگك علي غصبن .. ومشيت اميسره گوه
بعد ميعود ... بيك أردود
زماني الگوطر وعافك
************
يراعي البيت هم ناسي .. شلون الزغر گضيناه
الاخت من تربه وي خيهه ..الروح أمعلگه وياه
وچنت يوم الغبت عني .. أگضي اليوم حصره وآه
وهسه البيت أطبنه .. واگول أحسين ما ألگآه
صحت ابصوت.... كون الموت
أخذني وصرت بردافك
************
يراعي البيت و المحراب ... أون وني و يون ونه
فاگد ينشد أعله أحسين ... مابين خبر منه
گتله الوالي راح أبعيد ... فارگنه ومشه عنه
ون ونك يهل المحراب ... برجوته مابعد ضنه
ولينه غاب .. يالمحراب
خلي الدمع مذرافك
************
يراعي البيت باب البيت.. يون أوينحب ابحصره
يذكرنه أبفگد حيدر.. وخونه الحسن والزهره
وچنه الحين ينشدني.. وين وجوه المزهره
گتله ما بگت وليان.. كلهه مطرحه الغبره
أجينه أضيوف ...صد وشوف
گوم أستقبل أضيافك
************
يراعي البيت والعتبه... يخوية آنه إعثرت بيهه
جنهه تكلي وين حسين ... نور الله اليخطيهه
وآنه عبرتي بصدري ... شجاوبهه وشحاجيهه
عيني الماتشوف احسين ... أريد الطمهه وعميهه
خلافك صار ... ظلمة الدار
يخويه الحلوه أوصافك
************
يراعي البيت والحيطان ... مكدره والكدر بادي
الوحشه البيهه تذبحني ... وحزنهه يمرد أفادي
تنشدني أعله بو اليمه ...سيد عتره الهادي
گلتلهه الولي مذبوح ...وبظعنه سره الحادي
حلم تنعاد .. يبو السجاد
هذيچ الحلوه أيامك
************
يراعي البيت صدتلي ... العليله فاطمه بلهفه
گضتهه العله والآلام ... وترجف رجفه السعفه
بخبر عنك أفرحهه ...تريد أمن المــرض تشفه
جفنهه مالــــفاه النوم ... خلي اعيونهه تغفه
رد اوياي ... بنتك هاي
تشفىه بقبلهة أشفافك
************


اسئلكم الدعاء
محمد ابورغيف