أنخاك بدموع العين

[color=rgb(139, 0, 0)] أنخاك ابدموع العين * يحيدر لحگ اعلى حسين عن طف كربله چا وين * يحيدر لحگ اعلى حسين ---------- بويه ابعبرتي وبهمي ناديتك - ابوادي كربله حاظر تمنيتك عيني امن الطفوف انشبحت الجيتك - ومن صابو جبينه ابدمعتي انخيتك هذا اجبينه الي اتقدسوه * بويه بلحجر صابوه كسرو ليك اعز اجبين * يحيدر لحگ اعلى حسين ---------- اعز اجبين برض النايبة اتكسر - چا گلي عليمن عنه تتأخر مسح دم جبهته لن چبدته تنطر - اتعده سهمه ذاك الظهره يا حيدر إبن امي وگع وحده * ونبلة حرمله ابچبده كلت من چبدته ثلثين * يحيدر لحگ اعلى حسين ---------- طاح ابن امي إلمن ظلت خيامي - وشطت للتل يبويه والگلب ظامي ابذيج الحومه شنهي الشفته گدامي - امگطع شفت اخيي وهاجت آلامي حسين الخادمه جبريل * اشلون اهنا تسحگه الخيل وحيد وما اجاه امعين * يحيدر لحگ اعلى حسين ---------- تعنيت ابجروحي وحيرتي الحربه - أتوچه اعلى صبري ابهاذي الرهبه وشحجيلك على سهم الذي ابگلبه - المن دمّه بويه شيبته امخضبه هذا حسينك الغالي * امگطع علثره اگبالي يا فارس بدر وحنين * يحيدر لحگ اعلى حسين ---------- أحشم بلعده صرت ودمعتي اتسيل - صدر سيد شباب الجنة تحت الخيل سمعوني صحت محد نغر ويعيل - بويه ابجسم اخيي مثلو تمثيل من شفته يبس دمي * واويلي على ابن امي ردتك تنغر ابهل حين * يحيدر لحگ اعلى حسين ---------- ما رحموه وما رحمتني ذيج الناس - وشطت للعلگمي أتنخه بلعباس گلت بلچن أشوفن بيه بگايه انفاس - لنه ابلا چفوف ولا نظر لا راس سبع الگنطره اتشوفه * على باب الوفه اچفوفه وصاحت بلومي الچفين * يحيدر لحگ اعلى حسين ---------- ارجعت لابن امي بدموع الاسى وبلهم - شفت الكون كله اتغير ومغتم الشمر لنه على صدر الولي خيم - اگبالي ايحز وريده اليشخب امن الدم ابن امي خمدت انفاسه * وعلى راس الرمح راسه عطشان انذبح هلحين * يحيدر لحگ اعلى حسين [/color]