الى الفقراء من اهلي اقول

تحت المظله اتخدروا واحنه الاهل تحت الشمس عافونه

حتى الشهاده ابمشتره او واحدنه راحت عالكتاب اعيونه

وتدري الفقير بهالوكت محد يكله اشلونه

ومحد يدك بابه ويجي جي لن فرغ ما عونه

وتلكه الغني واكف نصب وجفوف اديه مدهونه

وشوف القميص من الشمس والله رايح لونه

وتشوف حاله من التعب محنيه دوم امتونه

او ولد الزناكين اللبس عالموده ويبدلونه

ولو راد يوليهم وكت بفلوسهم يولونه

والفقره تكظيهه ابعسر كل شي صعب يلكونه

والهم يغطيهم غطه وثوب الهم ايفصلونه

والليل لوجاهم مثل اوراق ويكلبونه

كل ساعه بحساب وشكل وارواحهم وسط الحيا مدفونه

ليش الفقير بهل الزمن هالناس ميرحمونه

والدنيه صفت والوكت يدمونه ويعادونه

والتعب باين بالوجه والتعب هد اجفونه

كل همه يشبع هالبطن بالجاي والصمونه

وبيه يحس هوبشر والناس اله يحسونه

ياخذ وينطي بكلمته ولارايه ايجهلونه

الدنيه بيه المعجزه والدار مامسكونه

حكم الاله بقدرته لوشاء اله ينطونه

العالي ينزل للتحت ويصعد المهيونه

تجربه خذه واتعض لاتغرك المزيونه

دنياك جم واحد تذل وتنطي اللي حد اسنونه

الماعرف فد يوم الطمع ولاخاف من يزلونه

بايع وحاله على الفقر وثبت المبدا عونه

اياك واتحذر بعد دنياك اهي مجنونه

اتبيع الفقير بسعر الذي همه اله يسومونه

من علي خذه حكمتك وانت تعرف مظمونه

خادم اهل البيت
ابو علي السعيدي