حنّه وشمع

لشد ارحالي واتعنّه -- اليوم الكربله ابهمّه
كالولي عرس بيهه -- واريد الهالعرس لمّه
وينه اليمشي ويايه -- تراها ابركبتي ذمّه
جالت حسرتي ابصدري -- وشوف الناس ملتمّه
واسمع همس بين الناس--ابهدية العرس مهتمّه
إشياخذ للفرح ويّاه --ا لكمر لو ياخذ النجمه
حنّه وشمع خذت اوياي -- وقصيدة تهنئه العمّه
ومشينه الكربله هوسات -- ابمشاعل تذبح الظلمه
وصلنه الساحة الزفّه -- وأهل العرس ماهمّه
ابدال الشمع شفنه النار -- شبّت حركت إخيمّه
ودوّر عالمعرس وين -- الصارت حنِّته دمّه
وأسمع صوت من ابعيد -- صوت اوخنكته الهضمه
رحت يوليدي ياجسّام -- إلك فدوه العمر يمّه
غبت عنّي ينور العين -- عليّه افراكك إشعظمه
فتت جبدتي امصابه -- اشلون اكدر أصل يمّه
أريد ابني ولب احشاي -- اريد ابكلبي أنه اضمّه
وعن وجه أزيل الدم -- واحبه ابصدره واشمّه
وابرد اجروحه بدموعي -- واخاف ادموعي إتلجمه
واصيحن وين بت عمّه -- ثوب العرس ختضمّه
وأم الخدر بالصيوان -- تجول اتصيح ياعمّه
صاحت وين اخويه حسين -- وكع جاسم يبو اليمّه
يعمّه اعليك ياويلي -- شباب اومابلغ حلمه
جاسم راح من إيدي -- التبدّه بعد شيلمّه
أسألكم الدعاء