وفاة الجواد ع -- يالمهدي المهدي -- شاركنه يالمهدي
المستهل
--
يالمهدي يالمهدي -- شاركنه يالمهدي
لجل الجواد انهل دمع -- شاركنه يالمهدي
--
يالمهدي انته بهل المصايب تعلم
ياهو الذي منكم يغايب يسلم
لو ذبح بسيوف الغدر لو بالسم
السان الزمان بهل المحن يتكلم
واسينه واسينه -- بالدمع واسينه
ابصوت البواچي الينسمع -- شاركنه يالمهدي
--
يالغايب اليله ابحّزنه انواسيك
ندري الجواد بهل المصاب ايبچيك
متهون هذي الفاجعه اليله اعليك
جمر المصيبه بينه مثل مابيك
فجعونه فجعونه -- بيا چبد فجعونه
ابچبد الجواد المنگطع -- شاركنه يالمهدي
--
يبن الحسن من يوم ضلع الزهره
ومن طبرة المحراب آ ياطبره
چم نايبه ومصاب بيك وجمره
وگلبك يغايب عفيه مامل صبره
شيجرعه شيجرعه -- هالصبر شيجرعه
گوم اطلب بثار الضلع -- شاركنه يالمهدي
--
يالغايب اتشوف المصايب جمّه
حللوّا كل واحد البيكم دمعه
أتراب الطفوف الچم ذبيح ايظمه
ياجسم متوذر تريد اتلمه
يانبله يانبله -- تشلعها يانبله
بنحر الطفل ماتنشلع -- يالمهدي شاركنه
--
تصّبر يغايب لشوكت عالطعنات
وماتنحصي بينه اشكثر من رميات
انحور اهلك بسيف البغض منحورات
أچبود الذي ابسم الخيانه اموذرات
اطلبها اطلبها -- ثاراتك اطلبها
وطالب ابثار اليرتضع -- شاركنه يالمهدي
--
يالغايب اليوم المصاب البينه
فگد الجواد وهوه المبچينه
وغيرك يغايب ياهوا اليواسينه
نتشارك اوياك بحزن خلينه
صّبرنه صّبرنه -- بهل الفجعه صّبرنه
اعلينه المصايب تجتمع -- يالمهدي شاركنه
--
سيد عدنان الحمامي
|