--
طلب الحوائج من الله في حق العباس عليه السلام
--
--
--
المستهل
---
عيني اعله چف العباس -- منه اريد امرادي
رايه خذت خضره أوياي -- واليمه ينشدني الجاي
-- منه اريد امرادي
--
عيني اعله گبتك باوعت -- من البعد شفت انوار
وكل واحد وبيده علگ -- يمك يجون الزوار
گلت آنه يمك أعتني -- وأحسبني يمك خطار
ادريها ولله من اجي -- مايظل گلبي محتار
كل واحد اليتعناك -- مايرد لهله فشلان
مهموم اجيت ابدنياي --- واليمه ينشدني الجاي
منه اريد امرادي
----
يالچفك ايفيض الخير -- والوادم التحلف بي
وشكثر چم واحد جاي-- بعطفك تكرمه وتنطيه
من والدك خصله البيك -- كل معوز اتحن اعليه
ومثل أمك ام الطيبات -- حاير ابد متخليه
ام البنين أم الخير -- أمك بعد معروفه
والناس تنخاها اهواي -- واليمه ينشدني الجاي
منه اريد امرادي
----
يالكرّمت كل الناس-- من كل جنس من كل لون
متفرق الهذا وذاك-- تسمعهم اشما يردون
والعدهم اهموم وعوز -- منك امراد ايحصلون
عامر مضيفك عباس -- يستقبل اليتعنون
ونته بعطائك معروف -- ياللي أكرمت چف وعين
من انتخيت اعله الماي-- واليمه ينشدني الجاي
منه اريد امرادي
----
چفوفك مناير شاخصه -- وگبتّك كعبة محتاج
وهاي الملايين التجي-- كلها تطوفك أفواج
للباري بيك اتوسلت -- بالزحمه چنهم حجاج
حتى الملك من يعتني -- وبعتبتك يحني التاج
وبحظرتك يسعي ايطوف-- كل معوز وكل ملهوف
مطمئن من عنده الراي -- واليمه ينشدني الجاي
منه اريد أمرادي
-----
بالفضل فضلك معروف -- تشهد بفضلك دنياك
وهاي الكرامه المعبود -- يابا الفضل هوه انطاك
رادك وسيله الهل الناس -- قاضي الحوايج خلاك
متفشل اليمك جاي-- متخيب اللي ينخاك
اويه الناس اطلب مشاي -- واليمه ينشدني الجاي
منه اريد امرادي
---
يمك يخو زينب جيت -- من الوكت بيه اجروح
تسمعني يمك ناديت -- بشابچك أمعلگ الروح
بيك ادري تزعل عباس -- لوشفت دمعي المسفوح
بس آنه راح ابقه اهنا -- يمك اظل وماروح
وآخذ عطائك بالاييد -- فشلان اطلع ماريد
بمرادي كحل عيناي -- واليمه ينشدني الجاي
منه اريد امرادي
---
-- سيد عدنان الحمامي
---