بين السجا ع وجابر الانصاري
يجابر گبر ابويه حسين شمدليك
شجابك والطريق ابعيد عمي اعليك
-----------
تعال اگعد يجابر رايدك يمي
شجابك والطريق ابعيد ياعمي
تشاركني ابمصابي وعلتي وهمي
هظمي اچبير متحمله الهظم لوبيك
-------------
هظمي اچبير عمي مايحمله انسان
اهنا چانت يعمي امذبحه الشبان
لبو فاضل وابويه حسين انه الدفان
اويانه ابها الحزن ومصابنه خليك
---------------
خليك ابحزن ويانه ياجابر
جيتك هاي شنهي الكربله زاير
ما جيت لابويه رادله ناصر
ظل وحده يعمي وحالته اتبچيك
----------
ابچي اعله الحسين المنذبح مظلوم
وخل دمعك يبلل ماعليك اهدوم
جمر دمعي يجابر وانچوي كل يوم
هم اتحس دمعتك بالجفن تچويك
----------------
واسيني يجابر شحملت الام
ادفنت بيدي يعمي الاكبر وجسام
وهذي جيتي مظيوم من الشام
شحچيلك بعد ادري الحچي ياذيك
--------------
يجابر ارد اخبر عن عضيد حسين
ادفنت جثته يعمي امگطعه الجفين
وراسه اعله الرمح ظل السهم بالعين
لورايد تشلعه العدو ميخليك
------------
اسولفلك بعد عن الالم والهم
حتى اليرتضع من اهلي مايسلم
ابعينك شوف لرماد الخيم والدم
وهاي اگبور اهلنه اعيونك اتراويك
----------------
يعمي اهنا ابويه امن احفرت گبره
لميت الظلوع الچانت امكسره
وناداني سمعته حسين من نحره
هم سامع نحر مذبوح ويناديك
--------------
من نحره اسمعت ناداني وابچي اعليه
على صدري الطفل يبني علي خليه
يجابر والگلب كل صبر ميظل بيه
عالمظلوم ابويه من اسولف ليك
-------------
اللهم بحق عليل كربلاء ع شافي كل مريض يالله
الشاعر الحسيني
سيد عدنان الحمامي
|