بسمه تعالى
اللهم صل على محمد وال محمد
-----------------
للانصار
----
المستهل
---------
هتفنه اويه اليهتفون ---- نضحي أويه اليضحون -- وياك - وياك
صبح واحدنه مجنون -- مثل عابس مثل جون -- وياك وياك
---------
يبو اليمه امقصرين اوياك شنهو انقدمه
بالبنين ومال نقسم الك نبذل والدمه
انت ريحانة محمد انت روح الفاطمه
انت شافع النه منقذ انت بيك الغانمه
اخذ هذا عهدنه --- ولانخلف وعدنه
الك ارواحنه اتهون --- مثل عابس مثل جون -- وياك -- وياك
------------------
ثابت وباقي عهدنه امن الازل عدنه عهد
ياسفينه او للنجاة أيامن البيها صعد
الك ارواح وبنين والك مانملك بعد
واليخدمك بالقيامه اهناك جائزته وجد
بعد امك تجازيه --- شفاعه اهناك تنطيه
بجنا الله ويفرحون --- مثل عابس مثل جون -- وياك وياك --
----------------
النصرتك باچر يفوز بروحه كل واحد يهب
والله خصك بالشفاعه ونته تشفع للمحب
وبيك يغفرله الذنوب ايروح مغفور الذنب
ومن يزوغ البصر باچر علي يروينه العذب
الك دمنه والارواح --- العمر قربان لو راح
واحنه أمن اليفوزون --- مثل عابس مثل جون -- وياك - وياك
------------------
أمن الازل احبابك احنه لا اليوم ولا أمس
يظل شلال المحبه بينه يروي كل نفس
ياحسين انته الامان وكل موالي بيه يحس
تظل غالي يبو اليمه وخصمك ايظل البخس
وين الخاصمك وين --- ماله گبر يحسين
خلها اتشوف العيون --- مثل عابس مثل جون -- وياك وياك
----------------------------
گبرك انشاهد ضريحه صار كعبه لليطوف
ناس تتعنه بجدمها ناس تتعنه زحوف
هالملايين التزورك يبو اليمه مو ألوف
حتى جبرائيل يمك ويه زوارك يطوف
گبرك كعبة احرار --- فاز اللي اجه زار
يمك خل يشوفون --- مثل عابس مثل جون -- وياك -- وياك
-------------------------
مايخيب العنده حاجه وگصد يمك مايخيب
جدك لالله حبيبه ونته للهادي حبيب
لو دعه الداعي ابضريحك الله للداعي يجيب
منك الوصفه اليجيك ومايروح الكل طبيب
بگبتك كل دعه انجاب--- تربتك وصفه التراب
بزوارك يرحبون --- مثل عابس مثل جون -- وياك -- وياك
سيد عدنان الحمامي
.....................
.......................
....للقاسم ع.......
...............
المستهل
...........
جبنالك الشمس --- يجاسم للعرس --- وگلبي بألم يحس
خاف من عندي تروح --- خاف ما أفرح انوح
.................
بيك فرحانه شمسنه ونته فرحان وفرحنه
والنجوم اليوم تضوي امساهره أويانه الصبحنه
يوم المبارك عليك وبالهلاهل كلنه صحنه
حلم هذا بعين امك خاف لايصبح جرحنه
غداره دنيتي -- تطفيلي شمعتي-- وتسلبني فرحتي
لمك اتخلي الجروح --- خاف ما افرح انوح
...........................
عطرت بدلة زفافك يبني والحنه اعجنتها
وهاذي صينية شموع الزفتك هم حظرتها
عيوني هاي اللي تشوفك الك قربان انذرتها
أمبارك الشمعه تگلي لمن بروحي اعلتها
روح أمه من ملك -- عماتك وهلك -- نثروا ورد الك
وعطرك وليدي يفوح -- خاف ما افرح انوح
................................
شگد مسعده نور جاسم لمه ومضوي سماها
هلال دنيه من اشوفه ابني لعيوني ضواها
تعمه عين الماتشوفه هالضوه لو ما اجاها
خايفه وگلبي لزمني خوفتي مدري شوراها
گمر ليلة قدر --- افرشله هالعمر -- بدربه لمن يمر
وجهه مامثله صبوح -- خاف ما افرح انوح
.......................
مثل ابوك بكل خصاله للحسن يوليدي چنك
من يصيبك يبني عارض أحمل آنه هذا عنك
ليله ما أجرع فرگتك من گبل من زغر سنك
اندعي يبني ابصلاتي الله لايحرمني منك
اتنفسك هوه --- بلسم جرح دوه -- لعين امك الضوه
تعوفني لا وين اروح -- خاف ما افرح انوح
......................
يالحنين وطيب انته يبني يامحله صفاتك
بالهنه عمتك دعتلك كلهن اوياهن خواتك
للسلامه گوم صلي افرشت سجادة صلاتك
اغله من الدنيا عندي لمك وليدي اشغلاتك
يانسمة الفجر --- انثر الك عطر --- ياجاسم البدر
يبني يالگلبك سموح --- خاف ما افرح انوح
.....................
خايفه ولنه يصير الچنت اخافن آنه منه
اهدعش عمره اوليدي راح سيوف عدوانه ولنه
شموعه مو بس هنه يطفن عمره وياهن طفنه
راح يالچان اعله أمه فارش أجناح المحنه
دمعي عليه يصب -- ليل الحزن صعب -- يشيبه للگلب
بعد ماريدچ يروح --- خاف ما افرح انوح
...........
..سيد عدنان الحمامي
.........................
..........
.....
للاكبر ع
....................
المستهل
..............
يحسين ودعته وبچت عينك للاكبر دمعه
وشلون لو وسط الحرب ادركني صاح اتسمعه
لا - لا متحمل فرگته
لا - مايرد بروحته
................
عالبعد ونته تشوفه ماشي والساحة نظاله
من محمد نور وجهه يابهائه ياجماله
ومن علي جده أخذها شمرته وماخذ خصاله
ونته ربيته بحنانك وشكثر منك دلاله
لو راح منك ضنوتك يحسين كلفه اغيابه
شيگول گلبك لوشف سيف اليضدك صابه
لا -- عدوانك من اتولته
لا - مايرد ابروحته
......................
من مشه الميدانه الاكبر بالاراده الصلبه عنده
چن علي حيدر تشوفه بكل گلب خلاله رهبه
ونته تدري بي شجاع او وحده ميثنيله ضربه
والابن لو راح يگطع من ابوه شريان گلبه
ربيت وتعبت شكثر يحسين وشدللته
الهل اليوم يفديلك عمر وبكربله من ردته
لا -- حزنت عيون الشافته
لا - مايرد بروحته
.....................
ودعك يحسين الاكبر ظامي چبده بحّر نهاره
رايد ايضحي گبلكم هوه رايد بالصداره
يدري وبساحة نظاله هالشهاده با انتظاره
بي شهم للموت تدري مايقدمله اعتذاره
دمه گبل دمك نذر تبقه يريدك سالم
ودعيتله امن المعركه وليدك يردلك غانم
لا -- كل الكتايب طوگته
لا -- مايرد بروحته
..............................
بهذا مصباح النزال ايودع حسين الحبيبه
وماكو بس الموت يمشي ويعثر بارض المصيبه
ياشباب اليوم رايد يختم بدمه مغيبه
صبرك شكبره الصبرته اي يبو الاكبر عجيبه
الجسام الاكبر ودعه وكله اعله ابويه عينك
الديني احامي ابساحتي ونته تحامي الدينك
لا -- زينب اجتي وباسته
لا -- مايرد بروحته
......................
ساعه لن ظامي يردله والعطش ماردله چبده
من أبوه ماي اليريده وبلچي ماي ايشوف عنده
حسين هوه چبده ظامي ورايد الچبده يبرده
ايحظنه للاكبر يشمه وخده خلاه اعله خده
راح الحسين الخيمته وگلها يليله ادعيله
بالخيمه امه و تندعي شالتها لالله الشيله
لا -- الها سالم رادته
لا -- مايرد بروحته
.................
سيد عدنان الحمامي
|