.
المستهل
.
صعبه الابو لو غايب هلاله
ابنه الرضا هالليله ياحاله
گلبه برحيله علم.. بالسجن عمره انختم
.
بويه شمسك عني غابت واظلم بعيني نهاري
يالچنت خيمه عليه وبالمحنه يضوي داري
العبره تخنگني بغيابك دمعي ميطفيلي ناري
والذي يفگد عزيزه گلبه يتجرح اثاري
جرح اليحن ماله شفه.. ينزف محنه وعاطفه
ما ليل بي جفني غفه... عالابو قل اصطباري
خيمه الابو ماكو عوظ عنه
ناخذ حنان وعاطفه منه
والعاش لحظة ألم... بالسجن عمره انختم
.
من چبد بالسم تگطع من غريب امفارگ ابنه
للرضا الكاظم يريده يحظر ايقبله ويحظنه
والألم من سم دليله من يجي بدمعه يسكنه
هوه هم مثله غريب ويدري هاي الغربه محنه
أمن البصره بقيوده وصل.. البغداد ميئوس الامل
ماله گرابه ولا أهل.... يواجهه يحظر بسجنه
بالسم تغيرت حالته ولونه
وين اليحظره ايغمض عيونه
سجانه منه انتقم... بالسجن عمره انختم
..
عالرضا خيمة مصيبه وبعد عالكاظم مصيبه
تغربوا تركوا وطنهم وكل محب فارگ حبيبه
مارحم بيهم قدرهم كل چبد ماضي لهيبه
والذي يختم حياته إجنازته تصبح غريبه
يبچي الرضا والوالده يريده
الكاظم بعد ينحب عله اوليده
شمسوي حتى انظلم... بالسجن عمره انختم
..
مصيبه فوگ مصيبه مرت عالهواشم مامثلها
فاطمه المعصومه ظلت بالغرب لايم اهلها
وزينب العاشت مصايب دمعه عالدمعه تهلها
لو رقيه وراس ابوها اتعيش عگبه مامهلها
وحسين ابوها بمصرعه... بخيول جثته امگطعه
چم نايبه وچم فاجعه.. البچت اجبال وسهلها
سكنه ورقيه بغربه تاليها
و معصومه بعدت عن اهاليها
أمن الذبح كلمن سلم... بالسجن عمره انختم
.
مهجتي يالرضا يبني اتمرمرت گبل المنيه
بقسوه والسجان ظالم نكلوا يوليدي بيه
وغير ذاك الهوه بسجني بظلمته مامر عليه
وآنه بالوحشه الرهيبه ردت اودعك تجي ليه
مثل الحسين بكربله... من ودع الأكبر اله
وداعك لبوك تحمله... قيدي وتفصمه إمن اديه
تودعني بيدك غمض عيوني
مظلوم صيحوا من تشيعوني
ينادون اهل الرحم... بالسجن عمره انختم
.

نودع الكاظم اليله وعلى مصابه يهل دمعنه
نحظر بتشيعه كلنه مصاب ابن جعفر فجعنه
وعالجسر سلمان ناده گومو ياشيعه سمعنه
الكاظم تشيعه شيعته
گطعوا بالسم چبدته
چفوف الئيمه غدرته
بالسجن غمظت عيونه وتنختم بالسم حياته

سيد عدنان الحمامي