وفاة السجاد ع --- يعمه ناويليني السيف -- بحر طويل
--
البحر الطويل
--
--
--
يعمه ناوليني السيف -- علي السجاد ناداها
عليل او بالمرض نحلان -- تلطم عمته خلاها
--
بفراش الولم ممدود -- ويجود بالم علته
لاحيل اليعينه ايگوم -- ويشوف اشجره ابعمته
ابضعيف الصوت ناداها -- يعمه وخافيه ونته
وزينب بالمعاره اتحوم
مشدوهه على المظلوم
متگبعه بحزن وهموم
وعبرات ابصدرها اتلوج -- ودم العين مجراها
--
وصلت خيمة السجاد -- والمدمع يهل جريان
گاللها يعمه اشصار -- اسمع صوت بالميدان
ابويه المالفاني الحين -- وآنه البلمرض نحلان
چان ايعود الي كل حين
ابويه وصحبته الطيبين
ايسولف والدمع بالعين
راد ايگوم خانه الحيل -- وعمته زاد بلواها
--
زينب يم علي السجاد -- تفگد حالته اتشوفه
وياها الهموم اهموم -- كظيمه شلون ملهوفه
عبرات ودمع من دم -- ابجسمها الروح مخطوفه
وگفت والدمع همال
گباله لاچن ابيا حال
يعمه اتگله هالانذال
هجمت وانخه بالوليان -- كلها سايله ادماها
--
اخبرك ياعلي عمه -- وتبچي زينب الكبره
هم تدري ابوك شلون -- يعمه طاح من مهره
يعمه المهر رد خالي -- يصهل دمعته اجره
جاوبني بدوموع العين
يزينب طاح اخوچ حسين
وچبده منگطع ثلثين
ويدگ بالحوافر حيل -- ادموعه اعرفت معناها
--
مشيت اويه المهر نيتي -- أشوف اشصار ببن امي
يعمه والمهر يبچي -- وشكبره صبح همي
لاصبر البقه عندي -- ابغير حسين رد يمي
يمهر حسين حاچيني
عفته وين ضي عيني
اريدن بيه تدليني
خاف اتولته العدوان -- وروحي ابوجل خلاها
--
صدگ لن انظر الحومه -- يعمه التموا اعله حسين
ناس ارماح ناس اسيوف -- العزيز الزهره متولين
طايح عالترب خده -- لامن ناصر او لامعين
طاحوله طعن بحراب
يعمه وبسهم منصاب
ريت البصر مني انعاب
ولتشوف الجره اعله حسين -- بفگده الدهر يبلاها
--
يعمه وراس ابوك حسين -- شفته امن الگفه گطعوه
وعشر اخيول يالسجاد -- لبوك حسين ويسحگوه
ضلوعه انرضن الصوبين -- وهدوم العليه سلبوه
وهاي الخيل اجت لينه
بنار وتحرگ اعلينه
خيمنه ولايظل بينه
واحد عالحريم ايذود -- ويدفع سطوة اعداها
--
يعمه مدي الي يمناچ -- من افراشي نهظيني
وسيفي هذا الگبالچ -- يعمه و بيه تحزميني
اريد الحومة الميدان -- اطبن وآخذ ابديني
بچت زينب على حاله
وهيه واگفه اگباله
تگله اهناك خياله
ونته بالمرض نحلان -- وشر هالگوم منواهم
--
سيد عدنان الحمامي
|