بصوابك صابوني و فجعوني وهضموني
عباس اتولوني و سلبوني و ضربوني
لو تسأل جفني المانام ... يحجيلك عن الالام
**1**
مشى دهـر النوايب عاشر ابعاشور .. اعمى و بينه يتعثر
يهاشم بدرك الساطع طفاه الجور .. شوفه اعله الثره امعفر
يهاشم خيل اميه اشداست امن اصدور .. من لب الفخر افخر
يهاشم يا خدر تدري صبح مشهور .. خدر المصطفه الاطهر!
زينب و بأخزاني و ميداني وصيواني
محتاره ابرضعاني و نسواني و نيراني
إنشد عباس الضرغام ... يحجيلك عن الالام
**2**
على نوك اليسر من كربله اطلعنه .. للكوفه بألم ساري
يا ريتك شفتنه وشفته مدمعنه .. وبطول الدرب جاري
يعباس ابمغيبك خويه لوَّعنه .. الحادي و يعلم الباري
يعباس الشماته تصرخ اسمعنه .. حسينك علترب عاري
احقاد و صبّوهه و ذاعوهه و كَالوهه
اسرار وكشفوهه و فضحوهه و علنوهه
لو تِسأل جور الايام .. يحجيلك عن الالام
**3**
سبيه و علهزل يا خويه خلوني .. تقبل يا سديد الراي ؟
زينب بت علي ومن عزي حرموني .. ماضن ترضه يا رواي
اميره امعززه بجالك يهابوني .. بعدك من يضل وياي
لو ادري اخسرك يا ضوه عيوني .. ما كَتلك اريد الماي
غدروك و غدروني و حرموني و ذلـوني
ظلموك و ظلموني و فجعوني وخانوني
تبجي بضيعتهه الاحلام .. تحجيلك عن الالام
**4**
يبو فاضل شفت علمشرعه زنودك .. الحرم شافنهن اويايه
و شفت جسمك عفير وعلترب جودك .. طايح منسجب مايه
يلسيفك صواعق يجدح ابزودك .. سيفك وينه و الرايه؟
يبو فاضل وسف بالهامه عامودك .. عكَبك طاحت الثايه
وخيامك حركوهه و سلبوهه ونهبوهه
وطفالك رعبوهه و هضموهه و يسروهه
اطفال ابولية ظلام ... تحجيلك عن الالام
**5**
يبن حيدر علي ذاك الدحه خيبر ... ذاك الي ضرب مرحب
عكَب عينك يخويه كل كَلب مجمر .. بفراكَك يضل يلهب
عكَب عزهه الفواطم خويه يمشكر .. علضهور الهزل تركب ؟
انته الطلعتنه ابهيبة المنضر .. انته اتكفلت زينب
كافلهه اوواليهه وراعيهه وحاميهه
حارسهه اتباريهه وراويهه وساقيهه
تقبل تتيسر للشام .. تحجيلك عن الالام
**6**
عجيبه اشلون صبري ما يمل مني .. شفت اهموم يابو هموم
شفت يا خويه منضر شوفه هدمني .. عكَبه ما حلالي النوم
شفت ضهر الحسين ابوكّعتك محني .. يصرخ للحراير كَوم
سْمَعِتْ ينده يخويه منهو ينصرني .. خويه استوحدوني الكَوم
بغيابك صابوني و ذبحوني و غدروني
بخيول اتعنوني و سحكَوني و داسوني
جرد يا خويه الصمصام ... يحجيلك عن الالام