غريب الكوفه مسلم - حسيني اول شهيد
نزل بيها أمير - صبح عدها أسير
حسيني اول شهيد
* * *
عقيلي وهاشمي عين الإبه اتشوفه - مرسول السماء ابإمرة الكوفه
راية حيدره اترفرف على اچفوفه - الكوفه ابدمها خطت مسلم احروفه
دخل مصلح مجاهد - يتم دينه يريد
لچن بيها انغدر - مضه ابأرض القدر
حسيني اول شهيد
* * *
مسلم هذا لو موسى البني اسرائيل - فلق چم هامه سيفه المنبع التظليل
واذا غدروه ألله ناصره ابجبريل - سيفه اعله العده يمطر حجر سجيل
علن ثوره مجيده - عزم حيدر يعيد
وحيد ابلا جنود - هتف لجله الخلود
حسيني اول شهيد
* * *
أهل الكوفه ماتت كل ظمائرها - وسفير حسين طب ليها يحرّرها
ابهيئة عيسى طب يحييها من شرها - ألف شيطان مرسوم اببواترها
نظر أهل المكيده - العبيد الله عبيد
حمل بيده لواه - تطرّز من دماه
حسيني اول شهيد
* * *
لقمان الحكيم ابهيئته قادم - يداوي علّة اهل الكوفه بالصارم
علنها ثوره يفضح بيها كل ظالم - نشر بالكوفه راية عز بني هاشم
لچن باعوه اهلها - وبگه ابحربه وحيد
ابزققها ظل يجول - لسان الحگ يگول
حسيني اول شهيد
* * *
الكتبتله أن اقدم بالحقد غدروه - بسهام ونبال وبالحجر يرموه
وبأبشع خيانه ضامي ويذبحوه - وبسواق المدينه جثه ويسحبوه
واله ظلت يتيمه - حميده الما تهيد
ابجمر فگده تصيح - مضه عودي ذبيح
حسيني اول شهيد