سافرت مجبور يمه والسبب مو بيه أني
والسبب چيه گلبي طيب كسر اجناحي زماني
وانتي تدرين ابمعزتچ يمه وحده ابغير ثاني
حبچ أبنبضي ييمه مـــــن يدگ گلبي ابثواني
أنتي ماي وأني وردة اوغير مايچ ما سگاني
شحجي يا يمه وشسولف دمعي يا يمه عماني
نازل اوما وگف سيله چنه تيزاب اوچواني
ما أنام ابغير حظنچ يمه حظنچ كل مكانــــي
والأكل طعمه ابغيابچ لذته راحت من لساني
احسد الي صاح يمه يمه بعدچ أني اعاني
يمه دار الغرب ذله اودهري لذله رماني
يمه محد داوه جرحي
يمه بعدچ طاح صرحي
يمه خاسر شنهو ربحي
اوصار شوفچ ليه اماني؟؟
بعدي يمه اشلون حالچ أه أدري انتي حزينه
اوصار حزنچ ويه دمعچ عل گلب زيد ونينه
وادري أذنچ تنطر أنتي لتليفون اورنينه
بالكي بيچ اتصل أني اوصوتي يوصل يل حنينه
يمه أدري افراگي نقمه وادري بالفرگه جريمه
يمه مو بيدي اوتركتچ وكتي خان اويا حريمه
حته طيفچ ما يمرني
وكتي من شوفچ حرمني
يمه مــــــن بين الكرفني
اولا هل غربـــه الأليمه