دجلة تعتذر للامام الكاظم عليه السلام
چنت يا مولاي الومن بالفرات
لأن بالطف قاسي ويه المؤمنين
قبل يمه ايطيح عباس الكفيل
ومايه ما يوصل الى احفاد الأمين
يا فرات ارد انشدك يابو الذنوب
من بعد طف كربله شلون الك عين
وانته ما تستحق بالدنيه تعيش
لأن يمك مات عطشان الحسين؟؟
وهسه أنه امن الفرات أكثر قسيت
وبالذنب والله اعترف مليانه
الحسين اعياله ما ضكهه الفرات
والعيال بمايي شو غرگانه
والفرات يموت چنت انه اگول
وهسه اليه الموت اگولن انه
لأن يا باب الحوائج قصريت
وغرگت زوارك الحزنانه
أنه دجله الما خنت يا سيدي
والعذر لله وألك مولانه
شحچي يا مولاي محتاره اشأگول
راح اسولفلك لچن خجلانه ؟؟
عالجسر يا موسى عادوهه الطفوف
ذوله أحفاد ال اميه الكفره
والخيم حرگوهه وعيال الحسين
طشروهه بكربلاء اعله الثره
أو رقيه اعله الجسر مشدوهه بال
تصيح وين حسين ذبحو منحره
والرضيع اليوم ذبحو من جديد
وزينب الحوراء هم امأسره
وارد اگلك عن أمر كلش حزين
وارجو منك يبن جعفر معذره
كتلو محمد لأن يشبه حسين
وغرگو عثمان سبع الگنطره
|