ابني الاكبر كل حياتي . وكل منايه
للاكبر ع
.................
المستهل
...............
أبني الأكبر كل حياتي ---- وكل مُنايه
وليدي وأدعيله بصلاتي --- وأقره آيه
دعه الأم عندك مُجاب --- ربي أحفظ كل شباب
...............
أبني الأكبر ودعت -- غُصه بگليبي اجرعت -- لألله ادعي أتفرعت -
بخيمتي وعيني تهل
صعب يوداع الابن --- شلون أمك من تحن --- هم بعد يطبگ جفن
فراگ لا لتظن سهل
كل شباب وكل فته -- تشم أمه نسمته --- تموت لو ماشمته
ميته أمه تنجعل
يبني عود أرجع اليه --- أرد أشمك
خاف لتروح أمن أديه --- وآنه أمك
أدعي ليصير المصاب --- ربي أحفظ كل شباب
...................2
يبني يالگلبي ملك --- روحي منذوره ألك--- أرجع اوليدي الهلك
عيش ويه أمك تعال
ليله لو ماشافتك -- تعمي عيني الفرگتك -- هاي يمي عمّتك
تگول لايگطع وصال
يبني ياهيبة هلي --- وليدي يالاكبر علي -- أمك ومتحن ألي
حلم هذا لو خيال
تدري يبني من عفتني --- تاه دربي
تبچي يمه لو شفتني -- بهظم گلبي
العذر مني هالعتاب --- ربي احفظ كل شباب
....................... 3
انته لعيوني ضوه --- انته لجروحي دوه -- گام يخنگني الهوه --
ومايمر بيه نسم
مثلي المضيعه ولد -- شحالها تصبح بعد -- شكثر لوليت ابمهد
يالچنت أجمل حلم
ردتك الشيبي ذخر --- ترد اتعاب العمر --- راح تعبي والصبر
گمت بجروحي ألم
مرت مصيبه عليه -- شاب راسي
گاموا يصبرون بيه --- هلي وناسي
موجهه لالله الخطاب --- ربي احفظ كل شباب
......................4
كل مره التفگد ظنه -- يومها ايصير بسنه -- بعد متشوف الهنه
تظل بثياب الحزن
يانصيبي اللي يشح -- أعزيز عندي وينذبح -- سووه بگليبي جرح
ينزف ومنه أون
دمه شفته بهل النظر -- گلبي لوليدي انفطر-- آه من هذا القدر
خلّه دمعي أعله الوجن
ادعي للغياب عدهن --- وبدعائي
ربي سلم كل ولدهن --- يارجائي
أو لا يطولون ألغياب --- ربي أحفظ كل شباب
.....................5
كل شباب أدعي أله --- ايسلمّه ربي الهله -- أو بالسلامه ايوصله
والحظن أمه يرد
ألفاگده وليد اشصعب -- تنجرح من الگلب -- أتصير مشدوهة درب
للمنيه أتضل تعد
شكثر آنه اتصبرت -- بهل المصيبه وكابرت -- لچن ولله اتحيرت
لمه غالي وينفگد
هاي والكل أم وصيتي --- مثلي صبري
من وگع عامود بيتي --- أنكسر ظهري
حلمي چن أصبح سراب --- ربي أحفظ كل شباب
...................
آه گلبي أو بلوته -- عله وليدي محنته -- هالمنيه أخذته
وندفن تحت الثره
گلب الأم هوه حنين -- وتفگد أتعاب السنين -- الها بس الله المعين
بحالها هوه دره
بريتي يتواگد جمر -- هالهوه لمن يمر-- راح من عندي ذخر --
أرضيت الله مقدره
بكل گلب سكنة الونه -- ياعجيبه
هالصبر ماغيره ألنه -- عالمصيبه
نصطبر بس بعذاب --- ربي احفظ كل شباب
.......
سيد عدنان الحمامي
|