ابوذيات . لسان حال زينب ع ---.
.
.
فراگ اهلي الاودهم يرعباتي
والي جبريل خادم يرعباتي
چذب من گال واحد يرعباتي
آنه زينب يلوذ الشرف بيه
--.
تريد ابچي عليكم دوم املاه
ويمي جم طفل ويريد ام لاه
فگدك للگلب عباس املاه
جروح وچم جرح چتال بيه
.
اصيحن آه من جرحي وحسبه
ويراوح بالحزن عمري وحسبه
اللي حسبات يا خويه وحسبه
أگولن راح عباس من اديه
.
على العباس اهل دمعي واكتلاه
تعال الشمر سب اختك وكتلاه
احشم بخوتي لاچن وكتلاه
ضل من اخوتي فزاع اليه
..
من مثلي تعذبت من صباها
ودم يجري دمعها من صباها
يبو فاضل العينك من صباها
انهدم سوري وعدوك شمت بيه
.
اسيره منو غيري بت نبيها
وحسافه بالخرابه بت نبيها
يخويه حسين ماتت بت نبيها
ودفناها المتن ازرگ رقيه.
.
رقيه اسمعت حسرة گلب ياريت
ودمعتها بقهر يحسين ياريت
عسه مجلس يزيد انهجم ياريت
ولابي ماتت ابنيتك رقيه
.
صحت والصوت من صيحي بحيلاي
اريد اشكي والك همي بحيلاي
يعباس اثر افراگک بحيلاي
وجفن عيني عليك ايسيل ميه
.
عله العباس اهل دمعي وكتلا
تعال الشمر سب اختك وكتلا
احشم بخوتي لاچن وكتلا
ظل امن اخوتي فزاع اليه
.
عيني اعله الضعن لو لسمايه
ردت طارش يجيني لسمايه
الفرات شلون باقي لسمايه
وظلن بالعطش سكنه ورقيه .
.
سيد عدنان الحمامي
|