للزهراء ع
--
-
-
يسلطان الزمان الدنيه تنتظره
يايوم وتفرح فاطمه الزهره
--
يسلطان الزمان اليا وكت مذخور
وين بهل الوسيعه بيا مچان اتدور
مو خاطر الزهره الهل الوكت مكسور
لساعه بصدرها نايمه العبره
---
يذخر الله ذخر للزهره ماعدها
ياخد ثار سطره الحومرت خدها
ولله من تجي وعينك تشاهدها
تبچي بخدها لمن تنظر السطره
----
تعال الباب امك فاطمه انظرها
من لاذت وراها وباغي يسطرها
ودم صدر الزجيه بيوم يعصرها
ظل عالباب رايد عينك اتنظره
----
ومحسنها يغايب بي أظن تعلم
من حقد النواصب هوه مايسلم
حتى العتبه لساعه دمعها دم
عالزهره وضلعها المابعد يبره
----
لساعه ألم كسر الضلع بيها
وماغيرك بثاره اللي يداويها
يالمحجوب أمك شوفها أشبيها
لليوم وتون من شدة العصره
------
غصبوا فدك منها وهذا حق مسلوب
بدار احزان ظلت وبدمعها أتلوب
تعلم بالجره ندريك يالمحجوب
وتدري بالضلع ماينجبر كسره
----
تعال وحاسب الكل ناصبي ومرتاب
عالزهره الظلم ماظن يجمعه اكتاب
يغايب من تجي بس عاين اعله الباب
ماخمدت النار البيها متوجره
---
رد حقها يغايب والضلع والباب
غيرك مايصح يبن الحسن طلاب
يمته ايهل علينه اهلالك اللي غاب
يبقه لشوكت متحزم بصبره
-----
راية بدر بيدك خل ترف بالكون
وموت أحمر يغايب خلهم ايشوفون
مصايبكم أهوايه يامصيبه أتهون
چم نايبه النحسب سيدي كثره
----
مصايب كربله لا ما أظن تنعد
من أهلك اليسلم سيدي محد
يبقه لشوكت باب الفرج منسد
لابد ينفتح لو يوم من عمره
----
-- سيد عدنان الحمامي
----