..........................................
قصيده گعده للحشد الابطال
...........................
المستهل
...............

ابطال ابطال -- هذا الحشد ابطال
صولة شرف صولتهم – من عباس غيرتهم
...................
هذا حشد الله المقدس هذا حشد العنده غيره
همُه ذوله اهل الولاء نظيفه عدهم هالسريره
ذوله تربات الشعائر همُه ذوله اهل البصيره
من منبر حسين العزم – ومن الشعائر هالزلم
كل واحد البيهم شهم --- ايعادل بوحده عشيره
مهيوب مهيوب – ابن الحشد مهيوب
حُرّه ابطون جابتهم – من عباس غيرتهم
.............................
هالحشد من الشعاير هوه متربي عليها
اخذ من نهظة حسين ادروس والمنفعه بيها
والشجاعه من برير الذله لا مايرتضيها
كل شاب بيهم ماوهن – ابهاي المعارك والمحن
صار ابن جسام الحسن – للمنيه من يجيها
عريس عريس – ضحه وهوه عريس
شمعة عرسه شمعتهم – من عباس غيرتهم
..............................
اخذ من هذا حشدنه شلون من لبه ندائه
تحاربه انفوس الضعيفه ومن سحگها بكبريائه
حشد للعز والمفاخر للوطن يبذل دمائه
واللي سرق هذا الشعب – يحارب حشدنه ياعجب
نعرف ونعلم بالسبب --- وين تم عقله بنائه
سحگوه سحگوه – براية علي سحگوه
وبسم حسين صرختهم --- من عباس غيرتهم
................................
امن الوهابيه التآمر من قطر اهل الرذيله
ذوله حكام الدواعش ذوله حكام العميله
ذوله لاسرائيل خدموا اشما تذم بيهم قليله
هذا التآمر دولي – يضعفون بيه دولة علي
ون شاء الله الحق يعتلي – وكل حُكم فاسد نزيله
خانوه خانوه --- الهذا الشعب خانوه
وناس الطيبه رفظتهم – من عباس غيرتهم
................
من منابرنه الشريفه انحشد انحارب فسقهم
وكل حرامي انصيح بسمه انسقطه ويطيح حظهم
نهبوا الخيرات كلها والخزينه صفت الهم
سرّاق باگوه للشعب – من الهم بصوته انتخب
ياويل من يوم الغضب – بالاقدام ايتم سحگهم
سّراق سّراق – الحق الناس سّراق
واهل الشرف ردعتهم --- من عباس غيرتهم
..............................
والذي خانوا وطنه هالهوه يحرم عليهم
ما اظن بيهم شريف وبس خزي والعار بيهم
اشحصلوا باعوا مدنهم قبضوا الذله بديهم
باعوها وبابخس ثمن – متآمرين اعله الوطن
وظل المواطن مرتهن -- چذب تالي كل حچيهم
باعوه باعوه --- الهذا الوطن باعوه
والحفظوا عقيدتهم – من عباس غيرتهم
......................

سيد عدنان الحمامي