المستهل
\\\\\\\
كل ارض عدنه كربله وكل يوم عاشور
مانبخل بدمنه الك يحسين منذور
برواح نشريك – بالغالي نفديك
\\\\\\\\\\\\\\\\\\\\\
يحسين قربان العمر لجلك لون راح
لأيمانه حبك صبح يابو علي اسلاح
ثابت مثل هيبة جبل حبك مينزاح
عالعهد نبقه سيدي انقدملك ارواح
اتزول الجبال وحبك البينه مينزال -- انته امان امن الخطر النه والاهوال
اشمتريد ننطيك -- بالغالي نفديك
\\\\\\\\\\\\\\\\\\\\\\\\\\
هامات نطبرها الك نرخص الهامات
بالدم نحدها سيدي شفرة القامات
ماشفنه واحد سيدي لمن طبر مات
بساحة ولائك سيدي نلبس الامات
بچفانه نطلع من يجي عاشر محرم – ومن روسنه ينزف الك يابو علي الدم
بالدم نواسيك – يالغالي نفديك
\\\\\\\\\\\\\\\\\\\\\\\
نحتيي انموت ومايهم نرضه بقدرنه
مو اغله من نحرك يبو اليمه نحرنه
زنجيل ابو سچاچين بيه ندمي ظهرنه
ميهمنه كل مغرض لون شامت نظرنه
كل الجسم ينزف دمه لجلك يمظلوم --- امجانين حبك للابد لاليله لايوم
لبيك نناديك -- بالغالي نفديك

\\\\\\\\\\\\\\\\\\\\
امجانين نمشي اعله الجمر بمحبتك شوف
ارگاب ونمدها الكربله وخل تنحر اسيوف
مو مشي لا له اعله الجدم نزحفلك ازحوف
لاخوف نعرف والنبي ونخوف الخوف
جدك محمد هم يجي ايشاهد دمانه -- والزهره امك كل عزه تحظر اويانه
متلهفه ليك -- بالغالي نفديك
\\\\\\\\\\\\\\\\\\\\\
نلطم لطم لمصيبتك مثل المجانين
وسام بصدرنه وباللطم نتباها يحسين
مو ماي لجلك من تهل دم تهمل العين
ياغالي انته للنبي روحه ورياحين
يحسين الك عدنه عهد ملزم وطاعه -- ومن امك انريد الاجر ويه الشفاعه
وبالمحشر اعليك -- بالغالي نفديك
\\\\\\\\\\\\\\\\\\\\
لو موته احنه او لوردت امن اگبورنه انگوم
ارواحنه محد ملك غيرك يمظلوم
وتشوف كل عاشگ يجي يم گبرك ايحوم
ايحصل الدعاء ابگبتك تجليله اللهموم
تربتك بلسم للجرح تشفي عللنه -- ويوم الحشر تحظر بعد انته املنه
الحبنه نراويك -- بالغالي نفديك
------------- سيد عدنان الحمامي