الك جينه ياوالينه
نزورك احنه بالفطره نطفي الشوگ والحسره
مشتاگين تدرينه

اجينه انزور ابو اليمه نشكيله هضايمنه
نتسابگ بلهفه وشوگ وبحضرته اتجمعنه
نريد العالم من انسير كون بهاي يفهمنه
نضحي بالنفس والمال هذي من عقايدنـــه

تبقى موجّره الجمره لضنوة فاطمه الزهره
لدرب الخير تهدينه

نمشي بدرب ابو السجاد هذي من مناقبنـه
تعاهدنه نزور حســـــــين وبالغفران عاهدنه
يعدل الحمل من ايميل يهوّن كل مصايبنه
يوگف بالحشر ويصيح ابشروا يا حبايبنه

احنه وياه عالفطره بيه الروح منسّره
يحقق كل امانينه

اجت لحسين هالزوار متعنيه وتدك بابــــه
تمشي له وتعد اهموم وي كل خطوه بترابـه
حزن والام هالغربه وخطر ماتنحصي اسبابه
نناشد من ابو اليمه الامل شو طوّل اغيابـــه؟

اليمته الغايب انّطره الگلب مجروح شيصبره
نريد احضور مهدينه

تحدينه الخطر واحنـــــــه منو اليوصل لعد حدنه
على اعيون الدرب تمشي جوارحنه ومدامعنـه
درس من حيـــــدر الــكرار عالشــــدات علمنــــه
نمــــــوت ومومهم نحيـــا ولا نترك شعايرنـــــه

نزور الفايز بصبـــره وبهل الفاجعه انذكـــره
وعلي الكرار حادينه

المشي هيّن لون غيره بعد للناس نخترعــــه
وتهون الروح لو راحت لجل بت بضعة البضعه
وابد ماتنصف الحوراء لاكلمــــــه ولا دمعــــــه
السده عليهه صعب وصفه وصعب علوادم اتجرعه

نواسي زينب الحره على الظلوا على الغبره
يحره ها تلگّينه

لون گطعو چفوف الايـــد وزرعو بالدروب اسيوف
منعوف المشي يحسيــن لاوالله لا منـــــــــعوف
شتسوه اچفوفنه يمـــــه الگطعو من اديه اجفوف
يبو فاضل يمنعونــــــــه ورغم عنهم اجينه انطوف

الف دمعه والف عبره وحسره اشد من حسره
على المگطوعه چفينه

اسلاح الكافرين ارهـــــاب واحنه سلاحنه الرايه
حزام الناسف والغــــــام واحنه احزام مشايه
بيارغنه الرفعناهــــــــــه دليل ومنهج وآيــــــه
هدفنه الواحـــــــــــد نزورك وهذي چانت الغايـــه

الدمعه فدوه لدمه نحره اللطم فدوه لجرح صدره
او سهم النابت بعينه

اجيناك والف ياريــت لو نستشهد ابدربــك
وكل مهموم همه ايزول من جذوره لو طبــّــك
ولو يسأل الما يدري نگلّه أرواحنه تحبــــك
لأن بيك الهدايه تكون بيك اموصّه من ربـــــك

حسين زيارتك عمره وحبك فرض نعتبره
معروفه براهينه


خادم اهل البيت
ابو علي السعيدي