دفن الحسين ع
البحر الطويل
--
-
يدفان اللحد وسعه -- وبعد اتوسعه البابه
على مهلك اخويه حسين -- بعده ينزف اصوابه
--
يدفان ادفن ابن امي -- بهيده اتنزله ابلحده
شوفه بس جسد عاري -- اخويه وراس ماعنده
وماتنعد جروحه البيه -- چم اصواب اللنعده
رماي النبل صابه -- ويگطع بالسهم چبده
يمه امذبحه الشبان -- كلها امذبحه ولده
وراسه اعله الرمح مرفوع -- وشيبه بالدمه اخضابه
---
يدفان العزيز ايكون -- العشيره هيه التشيعه
وكل اهله وعمامه اوياه -- وأخوته وصحبته وربعه
ليش ابن امي عالتربان -- ظل ابجثته المگطعه
ليش او لابواچي اعليه -- ولا واحد ذرف دمعه
هذا ابن النبي المختار -- وامه فاطمه البضعه
اخويه الچانت الوادم -- كلها أتقبل اعتابه
--
يدفان وعليك الله -- بدفنه أترفگ بحاله
لتگول الجسد دامي -- وكلها امگطعه أوصاله
لتگول ابحوافرها --سحگت صدره خياله
آنه شفته لبن أمي -- وآنه واگفه أگباله
الخيل الخيل آه الخيل -- هيه الغيبت اهلاله
وعالتل اصعدت ناديت -- حاه يحسين ومصابه
--
يدفان واسولفلك -- عن اللي كفل خدري
اخويه حسين صاح بصوت -- يعباس انكسر ظهري
ظل وحده معين ايريد -- وآنه امحيره بأمري
ناس ارماح ناس اسيوف -- ودمه امن الطعن يجري
وطاح ابمصرعه المظلوم -- عساني لاعشت عمري
ادري راح اخويه حسين -- عني ايطول اغيابه
--
يدفان الطفل وياه -- عبد الله انگطع نحره
مشينه لليسر عفناه -- يم حسين وبكتره
ويه حسين ادفنه ايكون -- وتوسده على صدره
اهناك محسن ايشوفه -- اخويه اهناك ينتظره
بدمه ايروح يالدفان -- تشوفه فاطمه الزهره
عله حاله تنظره امي -- دمه بعده بثيابه
--
سيد عدنان الحمامي
|