-

اشجاب الثره الهام الثريه اشجابه -- وكربله بيها حسين تزهي اگبابه

----

الهام المجد ياكربله اتعليتي -- ياصرح شامخ للسماء ابنيتي

كعبة العاشگ لبو اليمه اصفيتي -- والشمس تسجد كل وكت بعتابه

----

بعتابه چم هام انحنه وچم سلطان -- هاي الملايين التزوره برهان

حسين الذي خده انوضع عالتربان -- اصبح شفاء الكل مريض اترابه

----

تراب الذي يتوضه من دم حسين -- كحله صبح يبري الرمد من العين

اتشم ابضريحه للجنان ارياحين -- وكلمن ايزوره اتسجل أمن احبابه

----

أمن احبابه لومره تزوره ايعدك -- لوهم عليك او لو مصيبه عندك

لاتظن خايب ابو اليمه ايردك -- وتفوز من اتهل الدمع لمصابه

-----

ابچي لتبخل بالدمع من عيناك -- يحسين گله أمن الازل حبيناك

عالعهد ولآخر نفس عاهدناك -- نمشي الدرب لو بالدرب سلابه

----

أمشينه الدرب درب اليحبك مخطور -- نرهب الموت ونعتني ليك انزور

قربان لزيارتك قدمنه انحور -- والموت لجلك لاتظن انهابه

-----

منهاب يحسين المنايا لجلك -- بمحبتك لو الف مره نهلك

يحسين للجنه محبتك مسلك -- ياحجة الله البالغه وكتابه

-----

سيد عدنان الحمامي