امس چان الحسن لوغاب كل معوز يظل محتار لغيابه

امس چان الفقير ايلوذ بهل الكرم سهم العوز لوصابه

كلها تنتخيله ابساع فد فزعه تصول ابحگه طلابه

امس كلمن يصيبه الضيم وضنك العيش منه ايرگع اثيابه

يمد چفه الكريم ابساع گبل مايوصل المعوز لعد بابه

امس چان العفيف ابخير ساتر عفته والعفه جلبابه

اكو من تنشد اعله الحال ناس امحمله الخيرات لعتابه

شجاها اليوم بعض الناس واحدهم لبس للبخل جلبابه

غفت عين البخيل ونام وخد ذاك الفقير اتوسد اترابه

نسينه الحسن ظهره الچان يحملها العطايا الفقره احبابه

----------------- سيد عدنان الحمامي