الشاعر سراج السلطاني


ياباب النبوّة الحضرتـــــــــك عنّـــاي
كَصدتك ياعلي ابشوكي الفضح عيناي

من بغداد اجيتك وانتة جاي اتشوف
اعاين دمعتي ابصحنك اجتّي اضيوف
يمحــــراب العشكَ ياهدوة الملهـــوف
اجيتك ياعلي او جفي رفع رجــــواي

يمشكاة الجمال او صورة القرآن
يمعدن كل تجلّي ايصافح البرهان
يغيب القدرة يمرتب ضوى الأيمان
يا اصل الرسالة الما تريد الراي

علي جوهر يطرّز اسمة وجه النور
علي او هذا الاسم دلاّلي بي مأسور
احبنّة او اعشكّنة او صرت مسرور
احلة امن الشهد حبة الصبح منواي

اسجّل ذكرياتي ابحضرتك هاليوم
اشوفن كَبتك كَمرة ابوسطها انجوم
دعيت لآخر ايامي الزياره اتدوم
حتى ابكَبري كون ازيارتك ويّاي

اشم حضرة علي يرجع دليلي ايهيد
احس حبك نغم يعزفلي طور العيد
واحس ذات العشكَ يمك صدح تغريد
وانفض همّي لو رافَكني وسط ارداي

نهضت امن المواجع لمن اكَصدتك
وعرفت ايماني بس لاوح ذهب كَبتك
ملكت الدنية كلهــــــــــا لمّن اعشكَتك
وحفظت العزّة والغيرة ابدرب ممشاي

يالوح الصبر عندي طلب وياك
خلّيني ابرحمتك وبنعيم ارضاك
أنة المالحظة مرّت وتركت طرواك
أموت أحسن لون تهجرني يامولاي

كلمات سراج السلطاني
النجف الأشرف
12/5/2012م