الخطبه الشقشقية
........
أما والله تقمصها وكعد منظر
ويدري انا القطب للرحه من تفتر
.....
القطب والرحه والسيل اليمر يمي
يكف ثوبه ويرد يتعثر بهدمي
ألي مايرتقي الطير ويمس خشمي
وطويت الكشح عنها وكمت اتعذر
.....
اتعذر وثوبي النوب كفيته
وطفقت ألها ارتئي والسيف حديته
شفت انصار ماكو وكلمن ابيته
وشفت الصبر احجه وكمت اتصبر
.....
اصبر والقذه بالعين مدمعها
وشجه بحلكي ومرارة علكم اجرعها
خفت بس لاتتيه ومنهو يجمعها
مثل صم الرمل بالريح تتطشر
.......
تتطشر واصول أبأيد مكطوعه
لو طخيه وضريره وعايشه بلوعه
يهرم بيها شيخ وتنحني اضلوعه
ويشيب الها الصبي ويمتحن بيها اكثر
......
اكثر وانا ارثي الوادم اتنهبه
ومشه الاول ومات الخالف بدربه
بيد الثاني خلاها وغدت صعبه
وصار الموش ألها اعليه يتأمر
.......
يتأمر علي ويريد اجاملها
وكبل ميموت للثالث يدندلها
مضرعه وحامل وكاعد يَحَملها
ويحلبها وبعدهي بلا علف تجتر
.......
تجتر والخشن مسها بطرف شَعره
كثر بيها العذر والواكع ابعثره
صبح صاحبها مثل الشابخ ابكَبره
اذا اشنق خرم لو اسلس اتكنطر
.........
تكنطرها وصبرت بطول هلمده
وشِدات الوكت شده اباثر شده
راح الثالث وخلاها مشتده
سته وانا منهم وكمت اتحسر
...
اتحسر وكام وربعه ناداهم
فيا للشورى والساوتني وياهم!
واحد صهره واحد بلنسب جاهم
والثالث نفج حضنه وشمر انكر
.......
شمر الها واخوته اصبحت بواكَه
خضمو مال الله خضمة الناكه
بس الناس ماسكتت عله العاكه
كامت ذبحته وصارتله تتنكر
......
تتنكر واجتني النوب طلابه
مثل عرف الضبع لو كشر انيابه
عليِّ انهالت اوعلدار واصحابه
وسحكولي الحسن وحسين وانا انجر
......
انجر كون اكومن وانهض ابامري
وانه اتعذر وماتقبل بعذري
كمت واشلون كومه امحزم بصبري
كلت ما اعتذر واشلون اتعذر
........
كمت والناس عود انطتني بيعتها
نكثت طائفه ومرقت اخيتها
وقسطت اخرى ضدي وحرب سوتها
وباجر عله اعيالي الحرب تتكرر