بمناسبة وفاة الرسول الكريم (ص) لطم
ألكــــون أظْلم يهادينــه --- ولفراگك تهل عينه
تصيح الزهره بويه اوياك --- وحيدر بالحزن ينعاك
ولفراگك تهل عينه
****************
بعـــدك ماغبت ياســــــيد ألأكـــــــوان
مــدّت كـــل لســـنها وحدّت ألأســـنان
عقدت بالســـقيفه الـزور والبهـــــتان
تتآمر تــــــريد اتغــــيّر العنــــــــــوان
تحـــن الهبل وتريـده --- تريد الماضي اتعيده
وتجرّد سيفها الفتّاك --- وحيدر ملْتهي ويّاك
ولفرا گك تهل عينه
**************** 1
أول نكبه بعــــــــدك مصرع الزهره
الخلّت بالـگلب تسعر الــــف جمره
الكسر الضلع گلب المحب شيصبره
ولمصا ب الزچيــه فاضت العــــبره
التمّت رايحه لاوين --- تحرگ دار ابو الحسنين
بسمار وضلع راواك --- وبيده أشّر المثواك
ولفراگك تهل عينه
**************** 2
أمّين أبدي ألمصايب وأگعد أحـچلك
مــن أصحابك ألـچانت حقد تخفيلك
صبّت كـــــل حقدها أعله التوافيلك
اوهاي أخبارهم يالهادي نــرويلك
أنته النصّبت حيدر --- وشاهد چان هالمعشر
چف الصافحك لاواك --- بقه بس الذي والاك
ولفرا گك تهل عينه
**************** 3
وعترتك يالرسول إشلبِّسوها أحزان
ما ســمعوا وصيــتك لا أمر قـــرآن
وهمّه من ألأصل ماأعتنقوا ألأيمان
ضماير عدها ميته وذبحت الوجدان
ولسفك الدمه إلتمّت --- إبشرْها اعله الخلـگ عمّت
جزائك هذا من اعداك --- وعين أللي بقت ويّا ك
ولفرا گك تهل عينه
**************** 4
عنها ابكربلــه ما وصلتك ألأخبار
هناك بأهل بيتك بالطفوف إشصار
ذبحوا عترتك وأضرموا بيها النار
إلصدر حسين داست خيلها ألأشرار
ذبحــوا كــل أهـــل بيتك --- چانــــت هــذي أوصيتك ؟
كل گطرة دمه من دماك --- الطاح اعله الأرض ينخاك
ولفرا گك تهل عينه
**************** 5
بين الذبح خلصت عترتك وسموم
وبين ألســـلّبوا حقّه وبقه مظلوم
وبين أللي گضاها بالسـجن مالوم
تمنينه ألعترتــــــك تطلع إبهاليوم
وتسأل عنها هالأمّـــــــــه --- وينك يانبي الرحمــــه
الجره اعليها يحز بحشاك --- وضجّت تندب الأملاك
ولفرا گك تهل عينه
**************** 6
تظل شـــــيعتكم إبيا ذنب مطلوبـــه
كل يـــــوم النحور ابدمها مخضوبه
وتظل ابكل وكت الحـ گوگ مسلوبه
نحبكم واليحب ميعــوف محبوبـــــه
حبكم صبح بلسمنه --- واعداكم فلا إتهمنه
إشما جاروا فلا ننساك --- يجدد بالحزن ذكراك
ولفرا گك تهل عينه
**************** 7