بضعه من الخلد جنه بربيع حسين ---- ومدينه من العلم حملت رزايه البين
وبيبان الصبر طگت تصيح بصوت ---- ياقفل اليطگ صبره وطريقه امنين
مكسور الضلع عصره وجنحها يلوج --- وعگازه الضلع تتوجى بالحسنين
يلاويها الهضم جرد سيوفه الباب --- وتأخذها الكرامه اتحاكم السجين
ياسهم المضه بصدر النبوه يصيح --- ذباح الجبل ريض ذبحت الدين
حملوگ الردى وباشط لهيب الموت --- وچن حيل انهدم واتهدمت ركنين
للدين اصل وفرع يرسم عبير وشوك --- وأركانج عصم واضح ترى التبين
ناديتي السهم گبل المنيه وصاب --- وأتخطه الگلب صوب اگلوب اثنين
وحضرتي الجفن گبل المسير وسار --- ويبرالي الكبر مخفي وتشوفه العين
صح مخفي العلامه ولااثر ليه --- بس شم الترب يحمل مرار البين
محتار بيك الوصف مخفي وبلايه رسوم --- وشوصف هالكبر ينعه ويلم روحين
ضل هاجس بعد فرگه والم تشييع --- وبليل الدفن وبها للحد لا وين
مكتوم باب الحزن والغيظ راود يلم --- شذرات من فاطمه وينعاج بس بخجل
ومهموم جف الزمن وارضين ضلت تون --- محتار بالفاجعه وين انه اضم الامل
ترى احساسي رمل وجروح باتت امس --- تنشد غبار الوگت والماي حولج وشل
غرگان بالعاطفه ولجمات تنزف عبر --- بأحزان بيت انبنه ومن طين حر و وحل
ياواحه امل جود بوسط صحراء --- لأبتام باتت امس بركانچنه اشتعل
وخلينه نرسم ضلع بصدور نترك وشم --- ونكحلها بدمع لوفاض بينه ونزل
وخلينه نلبس هدم وخيوطه من فاطمه --- بثياب سوده وصفت حاشاك لبس السمل
واول ثياب الحزن زينب نشوفه اليوم --- يخدش ركام الصخر وطفوف موعدها
تنظر ديار النبي وخالي وتشوفه البيت --- وبيبان رسمت حزن والضيم كايدها
بعبرات صاحت علي ومن صوب دار النبي ---والدار تجدح شغف والشوگ يضهدها
فاطم والعمر دونج تلاشه وغاب --- وبسمارج ركز شوغات عددها
سنين اكصار عمرج شو قليلات --- عد الله جبيره احسين خلدها
يامحور امامه وتاج للمعصوم --- ياثورة فقر للعوز نحمدها
نترجه الوعد ثارات نتبع اثر --- يمسي ويميل الفجر ثارات رددها
مهدينه الامل امك تصيح الثار --- وبسابع سمه ومهيوب مشهدها
*
الحاج سامي الكعبي
15-4-2011