بسمه تعالى
سلام عليكم
----
المستهل
--
مسلم سفيرك يحسين -- غدرته الكوفه
شتگول من راح العين -- ماظن تشوفه
صبر حميده -- المسلم تريده
-------------
صّبرها الحميده اتيتمت يحسين
وامسحهن بديك ادموعها امن العين
تنشد من اجتك وينه مسلم وين
شتگلها اعله ابوها اتگلها لاتبچين
طفله وگلبها ازغيرون -- شيصبره يحسين
يچويها دمع العيون -- من تهمل العين
الراح اشيعيده --- المسلم تريده
----------
صير الها ابو يحسين باريها
يم سكنه ورقيه اخت خليها
يحسين اليتيمه عينك اعليها
طفله والحزن ماينحمل بيها
فگد الابو ماينراد -- للبت هظيمه
واسيها يابو السجاد -- صارت يتيمه
عگبه وحيده -- المسلم تريده
----------
وحيده اتظل حميده بالالم والهم
بعدها ابكربله اعيلها الحزن خيّم
حگها اوشمل ابوها مابعد يلتم
طفله وحيلها ابها الفاجعه اتهدم
نكثوا عهدهم شبساع -- اهل الظغينه
بالطمع للدين انباع -- والعهد وينه
يبن الصميده -- المسلم تريده
------
الكوفه طلبته اومسلم مشه بعزمه
راد الخير الها ويصلح الامه
سفير ايمثله لحسين ابن عمه
لچن بگلوبهم ماظلت الرحمه
تبعوا خطوات الشيطان -- عميه البصاير
ماعدهم ذرة ايمان -- ميته الظماير
تبچي العقيده -- المسلم تريده
----------
يحسين الغدر يحسين يدنالك
ونته ابكربله والشر تعنالك
چتال ابن عمك هوه چتالك
ارجع للوطن يحسين بعيالك
مبعوث مسلم من راح -- يصلح الامه
بيد الغدر والسفاح -- ينسفك دمه
گطعوا وريده -- المسلم تريده
---------
يحسين الحزن عالعايله خيّم
مسلم راح وانصب للحزن مآتم
هاي اول مصيبه والتجي اعظم
اعيالك تنسبي ونحور تنزف دم
يحسين باچر شتشوف -- يحسين باچر
ارماح المشهره وسيوف -- ودم المناحر
نكبه جديده -- المسلم تريده
-----
سيد عدنان الحمامي
|