-- قصيده گعده للزهراء ع -- يمه عفتيني ومشيتي
 

لاستشهاد الزهراء ع





==== گعده =====




المستهل
+++++
يمه عفتيني ومشيتي – يمه اظلم صار بيتي

شلون يم الحسن بيه – فرگتچ صعبه عليه

...................... 1

شلون اظل آنه واخوتي ياهو اليبارينه يُمّه

هذا اخويه حسين ينحب والحسن بدموعه يمه

ماگدر دمعه اعله زينب اخته بجفونه يظمه

يبچي الحسن وآنه انتحب --- كل دمعه چن جمره وتشب

ننحرم منچ ياذنب --- جرح فرگاچ اشيلمه

يمه من عمري اعله عمرچ --- ياصبر يايمه صبرچ

أمنه يتمتنه الزجيه --- فرگتچ صعبه عليه

................................ 2

يمه دار احزان عندچ وانه ونتي نعتنيله

شكثر والجدي محمد گمتي بالهم تشتكيله

وادري يتألم بگبره جدي يايمه دليله

تونين من كسر الضلع --- وبعينچ ايلوج الدمع

وصوت البواچي ينسمع – ودمعي وي دمعچ مسيله

للنبي شنهو يعذره --- العله عينچ خله سطره

مارعه حرمه النبيه --- فرگتچ تصعب عليه

.................................. 3

فاطمه أمنه حنينه خيمه ومخيمه علينه

ابد ماترتاح هيه لو تشوف الحزن بينه

تلوب والهم يعتصرها لون تسمعنه بچينه

ياريت امنه سالمه --- وتظل علينه امخيمه

اعزيزتنه امنه فاطمه – مامثل امنه حنينه

بغفله يالزهره رحلتي --- وأغله من الروح انتي

گبلچ اتمنه المنيه -- فرگتچ صعبه عليه

.............................. 4

يمه شفت صواب ضلعچ عالالم والهم صبرتي

بعصرت الباب وسمعتچ يامحمد بويه صحتي

ومحسن الطاح بعتبته الزمتي ضلعچ ونتي طحتي

يافضه صحتي بصرختچ -- - للباب اجتي وحملتچ

لطمت بدمچ شافتچ --- والي يايمه نظرتي

ثنينه يمه بچينه --- وگلبچ اشتدلي حنينه

يمه يم نفس الابيه --- فرگتچ صعبه عليه

.................................. 5

ريت هذا السطر عينچ من عسن تنشل يمينه

وذاك للباب الدفعها من عمت يايمه عينه

بت محمد چن نساها بيها من وصه نبينه

والاشد غصبوا نحلتچ --- وناس اللئيمه رضتچ

للموت گربت ساعتچ --- والحزن يمه يجينه

فدك ويغصبوها منها --- وين ابوها النبي عنها

يجي ويشوف الرزيه --- فرگتچ صعبه عليه

................................. 6

ودعت امي حزنها والمصايب ودعنها

خلصت حزن اليالي ومابطل فد ليله ونها

راحت الزهره بالمها ويبست الدمعه بجفنها

كلفه علينه الفاجعه --- نعش امي صار انودعه

ابظلمة الليل انشيعه --- عگب لوعتها ومحنها

سلمت امي عمرها ---- وضيعوا اعلينه گبرها

بعد كل ذيچ الاذيه --- فرگتچ صعبه عليه

--------- سيد عدنان الحمامي -----------