ياجسر الايمه شبيك..جينه نزور والينه؟الى مولاي الامام الكاظم ع اقول
 

ياجسر الايمه شبيك..جينه نزور والينه
عفنه ديارنه بهل اليوم ..جينه وجبنه اهالينه

ياجسر الايمه اشكي الحاله..جيتك من بعد وادموعي هماله
كلبي منشعب هاليوم دلاله.. كثرت هل المصايب تدري عالو علينه
ياجسر الايمه شبيك..جينه نزور والينه

شلنه ارواحنه وجيناك مشايه..وارفعنه بحزن مولاي هالرايه
تركنه اديارنه وجيناك وفايه..مانرهم عل فركاك ..مصابك حيل ياذينه
ياجسر الايمه شبيك..جينه نزور والينه

الاف الاجت هاليوم ببلادي..تصيح بصوت يمولاي وتنادي
سلام الله تصيح الزهره اولادي..حتى الزهره يمولاي..ويانه تبارينه
ياجسر الايمه شبيك..جينه نزور والينه

جينه انصيح يامولاي هذا اليوم..كلبي من الحزن مفجوع هالمهموم
نصيح ابصوت يالكاظم يالمسموم.. ويانه الاجت مولاي كل واحد يعزينه
ياجسر الايمه شبيك..جينه نزور والينه

ماهنمه اليفجر رغم كل الصار..سلمنه المنايا ارواحنه والدار
والكم هل اجينه اليوم والزوار..تصيح بصوت يمولاي خل تسمع اعادينه
ياجسر الايمه شبيك..جينه نزور والينه

تذكرت الجسر وشبيه من سنتين.. زوار الاجت ماتنعرف امنين
ضحت بالنفس وغمضت هالعين..رادت بالجسر اتوفي كل دينه
ياجسر الايمه شبيك..جينه نزور والينه

يامحله الشهاده الصارت ابغداد.. عل جسر الايمه انطينه الاولاد
كسر النواصب والكفر والحاد..رغم جور النواصب شما تلاوينه
ياجسر الايمه شبيك..جينه نزور والينه

خادم اهل البيت
ابو علي السعيدي

الاخ الغالي
والشاعر الكبير السيد عدنان الحمامي المحترم
مروكم الكريم اسعدني وكلمات الاطراء الجميل
وفقكم الله لكل خير
تحيات
اخوكم
ابو علي السعيدي