اللهم صل على محمد وآل محمد وعجل فرجهم

مُشتاگــــــــه لحسيــــــــن ( في أم البنين عليها السلام )
ــــــــــــــــــــــــــــــــــــــــــــــــــ ــــــــــــــــــــــــــــــــــــــــ
مُشتاگــه لحسين === دم تجري العين
عين الوفيّه الصابره === أم البنين الطاهره
دم تجري العين
ــــــــــــــــــــــــــــــــــــــــــــــــــ ــــــــــــــــــــــــ
ظلت وحيــــــــده إو تنتظر == يرجع أبو اليمّه إيعود
وإتعيش أيّام الأمــــــل == يفتح مُضيفه المسدود
تفرش طريقه بالورد == يملي مُكانه المشهود
وإتروح أيّام الحـزن == تشكر عطايا المعبود
وإتنادي عباس === يستقبل الناس
مُشتاگه إلهُم ناطره === أم البنين الطاهره
دم تجري العين
ـــــــــــــــــــــــــــــــــــــ
ما تدري صارت ملحمه == وإبكربلـــــه حـــل الـــــزود
والتضحيه بالطف هدف == دون الحُسيــــن الموعــــــود
موعــــــــــود لازم ينتصـــــــر == والحق على الشر إيسود
والدم رسم أعظم مجـد == ما فارگ إحسين إيجود
ما ظلت إولاد === ركبوها الأمجاد
بيها الرزايا دايره === أم البنين الطاهره
دم تجري العين
ـــــــــــــــــــــــــــــــــــــ
يوم الوُصل إلها الخبـر == من سمعت الناعي إينوح
طار الگلب منها إو مشه == ينزف دمـــــاه إو مجـــــروح
والناعي شاف الوالهه == تفگـــد گلبها والـــــروح
لو يذكر الصار إو جره == بحسيـــن من ظل مذبوح
منها العگل تاه === من نادى ويلاه
نيران بيها ساجره === أم البنين الطاهره
دم تجري العين
ـــــــــــــــــــــــــــــــــــــــ
رسمت گبـــــور الأربعه == فِرْدَت گبر هم لحسين
تروي ترابه بالدمـــــــع == حد ما عِمَتها العينيين
وينك يحيدر ياعلي == إحضرهـــــــــــا أم الطيبين
شارك عزاها إبدمعتك == شاهدهــــــا ذوَبّها البين
مِنهّدة الحيل === ما تهجع إبليل
للنوم صارت هاجره === أم البنين الطاهره
دم تجري العين
ــــــــــــــــــــــــــــــــــــــ
عنوان صارت للوفه == نور إو يشع أم عبّاس
عدها الخصال الطيبّه == ظلــت تسولفها الناس
أكرمهــــــــــا الله بالكـــــــرم == عدها الكرم ما ينقاس
إذكرها وإطلب حاجتك == تاخذها مرفــوع الراس
لو عله تاذيك === ظلمه لياليك
إنخاها ذيچ الزاهره === أم البنين الطاهره
دم تجري العين
ــــــــــــــــــــــــــــــــــــــــ
عزوا يشيعه المرتضه == عــــــــزوا قطيع الكفيّن
هاليوم حلت فاجعة == أم البنيـــــــن الطيبـــــــين
إحضرها ياحامي الحمه == ويّـــــاك جيب أم إحسين
شيعوا نعش أم الوفه == تستاهــل إدموع العين
تستاهل النوح === ضحتها للروح
ألكم يحيدر ناظره === أم البنين الطاهره
دم تجري العين
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــ

مع تحيات شاعر اهل البيت / جابر النجفي
إسمعوا القصيده على هذا الرابط
http://www.wlidk.net/dldpsr05823.mp3.htm