طفلة وشفت حيدر جدي ***من أرض النجف حاضر عندي
ويكَللي كل أهلج ميتين***يا طفلة إلمن تنتظرين
من أرض النجف حاضر عندي
*******
من عيني حوض الكوثر إيصب أنهار***قلبي جهنم بالحزن يلفح نار
بهالحالة جيت أكَعدت يم باب الدار***أترجى من الأهل توصل أخبار
ماشوف لن فارس إجى يثير غبار***لمن وصل لن شفته جدي الكرار
نظراته ظل يتأملني ***يمسح دمعتي ويسألني
ليش الدمع بعينج تجرين***ياطلفة إلمن تنتظرين
من أرض النجف حاضر عندي
********
يجاجيني وبوجهه الحزن يتستر***وبصخرة عيونه الدمع يتكسّر
ويقول عن وجهج عسى بعيد الشر*** اتعرفيني من هو وليش قاطع هالبر
يا طفلة جدج آنه جدج حيدر***أحضر الشدة شلون إلج ما أحضر
للشدة أحضر من يومي***جيت او أنشدج بهمومي
مذهولة ليش وتلتفتين***يا طفلة إلمن تنتظرين
من أرض النجف حاضر عندي
************
ياطفلة جايب لج خبر ما ينصح***يخلي الدمع من ناظرج دم يطفح
بمسحة عطف بيدي إعلى راسج أمسح ***من مسحة إيدي هالخبر يتوضح
بالطف هلج ظلت دماهم تسفح***وكل جسد من عدهم صريع بمذبح
جسوم إخوتج بالطف صرعة***شتنفع بعد هاي الدمعة
بكسرة الخاطر تبجين***ياطفلة إلمن تنتظرين
من أرض المجف حاضر عندي
**********
ياطفلة بالطف كَظت كل الفتيان***أولاد عمج وأخوتج بالميدان
صرعة وعليهم يسفي دار التربان***حتى عمامج إلها المقدر حان
هذا ذبيح بلا غسل لا أجفان***وذاكَ إعلى جرف المشرعة بلا ذرعان
طول إنتظارج ماينفع***وأنتِ إعلى نارج والمدمع
تتلفتين إيسار إيمين***ياطفلة إلمن تنتظرين
من أرض النجف حاضر عندي
*********
جاوبته وبصدري إنحدر سيل الهم*** لاشك دليلي على الأهل يتألم
لجن يهون امصابها وسفك الدم***لا زال أبوية حسين حي ما أهتم
جاوبني جدي جسم أبوج اتخذم***ابصدره حوافر خيل أمية اتهشم
بالحافر العسكر داسه***فوق الرمح شالوا راسه
وعا لغبرة جسمه بلا تجفين***يا طفلة إلمن تنتظرين
من أرض النجف حاضر عندي
********
من كل هلج ياطفلة واحد ماظل*** إلمن بعد قلبج يظل يتأمل
لا زم ضميرج للغصص يتحمل***وتتصبر ين إعلى المصاب إللي حل
رب الجلالة إبحالتج يتكفل ***بشّر الصابر بالكتاب المنزل
جاوبته صوتج صبرني***لجن سؤالك حيرني
ويظل إيراودني بكل حين***ياطفلة إلمن تنتظرين
من أرض النجف حاضر عندي
********
من أرض النجف يا جدي من قبرك جيت***إبموت الأهل وش هالخبر بيه وافيت
شمعة البيت انطفت وأنحب ظليت***يحرم عليه أنجان أطب هذا البيت
جنت أنتظر أهلي ترد وتمنيت ***صرت أنتظر موتي أموتن يا ريت
دمعة حزن عيني تهلها***وأحجي أو يا روحي وأسألها
غير الأجل عقب الطيبين***يا طفلة إلمن تنتظرين
من أرض النجف حاضر عندي