من هلي داري خليه * اظلمّت الدنيه عليه
اعليله گمت اتمنه موتي * بفرگة اعيالي واخوتي
اظلمت الدنيه عليه
----------
آينار الفرگه ظلت تچوي بيه - وآيعلتي البيها شفت آنه المنيه
كل هلي عني مشوا للغاضريه - حتى عبد الله الطفل واختي رقيه
كل اخوتي فارگوني * اعليله طفله ضيعوني
ايردد ابهل ونّه صوتي * بفرگة اعيالي واخوتي
اظلمت الدنيه عليه
----------
ابحزني وبعلتي بگيت آنه وحيده - كل هلي عني صفت تالي بعيده
وجه ابويه الغالي دمعي ما يعيده - لا ابويه جاني لا عمي عضيده
لا إجه الاكبر اخويه * لا اُبو فاضل وابويه
ظلت اعليهم نخوتي * بفرگة اعيالي واخوتي
اظلمت الدنيه عليه
----------
ابساعة الودعني ابويه الغالي شفته - ضمني الصدره وجرت بالهم دمعته
ابهالوداع آيسني عودي من رَجعته - من شفت كل اهلي ماخذها ابسفرته
گلبي بوداعه تگطع * وجفني ينطر جيته يرجع
انحلت ابهالبلوه قوتي * بفرگة اعيالي واخوتي
اظلمت الدنيه عليه
----------
فاحت ابهذا سفرهم ريحة الدم - ما يرد عودي اليه گلبي يعلم
حتى محرابه ومچانه اخلافه أظلم - والله گلبي ابفرگت الوالي تهدم
منه ظل محرابه خالي * وحشه بفراگه الليالي
ابوجهه چانت كل سلوتي * بفرگة اعيالي واخوتي
اظلمت الدنيه عليه
----------
كل مسه أگصد لعد گبر الزجيه - أبچي لفراگ الاُبو طول المسيه
ابحرگه اندب راح ابويه منّ اديه - يالزجيه امنين اجتني الغاضريه
عيني يتهامل دمعها * يم الي كسروا ضلعها
أشچي للزهره بلوتي * بفرگة اعيالي واخوتي
اظلمت الدنيه عليه
----------
ابصبري وابدمعي رجوع اهلي نطرته - لن اجه بشر ونعه عودي ابچلمته
يا أهل يثرب صرخ واتهل دمعته - حسين ابو اليمه صرخ گطعوا رگبته
عودي بالطف ظامي ذبحوه * وجسمه بالخياله سحگوه
أصرخ ابنومي وصحوتي * بفرگة اعيالي واخوتي
اظلمت الدنيه عليه