تريد الماي اليوم سكينه
****************
سكنه تعنت خيمة عمهه
تتعثر ياويلي بهمهه
كام ألهه العباس وشمهه
من عمج شنهو التردينه
*****************
ياعمي تكله وتتحسر
عطشانه وجبدي اللي تفطر
جيتك من أطفال وخدر
من جودك ياعم تروينه
*****************
العباس لسكنه يكلهه
ياعمي الطلبه شمسهلهه
عاليه اكلبهه وسافلهه
وهسه انتي الماي تشربينه
*****************
أتعنه الكافل للحومه
عباس ويامعظم يومه
ضرغام ومعروفه علومه
والموت يرفرف بيمينه
*****************
آنه العباس تعرفوني
من حيدر سري ومضموني
شلت الموت بنص عيوني
لجل حسين ونصرة دينه
*****************
خاض الماي وهيس برده
تذكر عطش حسين وجبده
يشرب مايكدر من عنده
الاطفال وسكنه متانينه
*****************
عباس على الخيمه أتعنه
يتأمل يوصل يتمنه
يوْصل ألماي وتشرب سكنه
بس العدوان محوطينه
******************
وحده العباس من تشوفه
صال بصولاته المعروفه
بس غدرآ كطعوله جفوفه
وضربو جوده وصابو عينه
******************
تكنطرمن صهوة ميمونه
طاح تمدد وسط الكونه
وحده وآلاف اليولونه
حسين أتعنه وراد يعينه
*******************
يحسين أرجوك تخليني
ماريد هناك توديني
شعذري لسكنه من تحاجيني
وعدك ياعمي جاوينه
******************
ياعمي سكينه تعذريني
مصيوب وماشوف بعيني
ياعمي وكطعو جفيني
وبعينج حالي تشوفينه
*******************
ونسالكم الدعاااااااااااااااااء