آنه امكـَ وناديتك
 

آنه امك وناديتك * باربع شباب افديتك
ثائرين - يا حسين
باربع شباب افديتك
----------
آنه امك اللي ربّتك - يا نبض گلبي وعيني
إنته إمامي وضنوتي - وصومي وصلاتي وديني
هاك اخذ يبني ابسفرتك - گلبي وجميع ابنيني
بس كون يا أقدس بشر - سالم ترد يحسيني
مذخوره أربع أُخوه * لتراب رجلك فدوه
ناصرين - يا حسين
باربع شباب افديتك
----------
يحسيني هذي فتيتي - سور وحصن لخيامك
يحسيني هذي ارويحتي - راحه الجميع آلامك
يحسيني گلبي البيه عشت - خليه يسلّي ايامك
يحسيني آنه وفتيتي - نفتخر من خدامك
دين الله كله انشوفك * للموت ابد منعوفك
قائلين - يا حسين
باربع شباب افديتك
----------
كل اخوتك يا بو علي - الهذا السفر متحمسين
عبد الله عون وجعفرك - للطف إلك مذخورين
وطالع اوياك ابهالسفر - راعي اغلى واقدس چفين
وصّيته سبع الگنطره - يگلبها طفك صفين
هذي وصيّت أُمهم * والوفه اليجري ابدمهم
للوتين - ياحسين
باربع شباب افديتك
----------
يالعنّي رايد ترتحل - هذا الگلب شيصبره
يا خامس اصحاب الكِسا - اوداعك الگلبي ايفسره
ابمرقدها واسمعها تون - لجلك البضعه الزهره
تدري ابسفرتك تنقتل - واتظل طريح الغبره
إلك امك تنوح * تنادي ابهالجروح
نور عين - يا حسين
باربع شباب افديتك
----------
لارض البقيع اتوجَّهت - يَم الزچيه البضعه
احسينچ يبت سيد البشر - طالع وما بيه رجعه
ما هَمها فاطمة الطهر - كسرة صدرها وضلعه
آيا حسين وكربته - گلبي مصابه ايگطعه
لمصابك ابهالليله * دمع المصيبه اتسيله
كُلَ حِين - يا حُسين
باربع شباب افديتك
----------
أدعي الله يبني ابسفرتك - سالم يردك ليه
وعيني تظل الجيتك - يبن البتول اربيّه
قرآني إسمك يا حسين - اترتل ابطاريه
انته الهوه الأتنفسه - بانوارك القدسيه
يا سلوتي ويا روحي * تنزف تظل اجروحي
ابهالسنين - يا حسين
باربع شباب افديتك