:: منتديات السيد عدنان الحمامي ::

خويه يعباس * مُصابك هدّه صبري
خويه يعباس * كِسرت ابلوعه ظهري
----------
منّ اسمعت صوتك يخي - اتنادي ادركني اهضمني
من خيمتي الصوب النهر - جيتك ابظهر المحني
واعثرت بچفوف الإبه - البيها الوفه متحنّي
وشفتك ابجنب المشرعه - وحالك وجسمك فتني
وي حالتك هاي * أودع آنه عمري
خويه يعباس * كِسرت ابلوعه ظهري
----------
گلبي تگطّع يلأخو - من شفت گطع الچفين
يا راس ارفعه وهامتك - بالعمد ليها امهشمين
عيني طفاها حرمله - لمن رمى أقدس عين
خويه اشتفه بيّه العدو - ابموتتك يعضيد حسين
وي موتتك مات * عضيدك خويه تدري
خويه يعباس * كسرت ابلوعه ظهري
----------
يلمتت ضامي اعله النهر - چم جرح هذا ابجسمك
عين انطفت بشرس سهم - وعين انطفت من دمك
ابيا گلب اطلّع هالسهم - خافن يخويه ايألمك
لا بيّه اعوفك عالترب - لا آخِذك لخيمّك
يصعب يعباس * عليك الساعه أمري
خويه يعباس * كسرت ابلوعه ظهري
----------
تتنطرك يا بالفضل - بالخيم أطفالك هاي
كل طفل يصرخ بالألم - يا عمي فت گلبي اضماي
يلواعدت سكنه ترد - ليها وتجيب الها الماي
تصرخ اسكينه امن الضمه - ابگطرة ندى بلّ اشفاي
وعگبك يعباس * منو اليحرس ابخدري
خويه يعباس * كسرت ابلوعه ظهري