:: منتديات السيد عدنان الحمامي :: - قصيدة شكوى للمرحوم الشاعر الهزلي حسين قسام

وحگـ عزتك يربي استفلست آنه – مثل اكميل من گابل الحنانه

وحگـ عزتك يربي امخربطة احوالي – وخاف وياي يبگَه الفگر للتالي

لازگلي على اعباتي وعلى انعالي – ويضربني الوكت دانه باثر دانه

************

وحگـ عزتك يربي ما بگالي حال – أثاث البيت كلها باعها الدلال

عندي ابنات كلها ازغار عندي اطفال – كل اللي تشوفه امهلِّبه اردانه

**************

وحگـ عزتك يربي ما نبات ابلاش – وحوشي بعد ما يعتازله وحّاش

مسجد صار بيتي ماكو بيه افراش - مابي صفر وتمزگَت حصرانه

*************

يعصر النور مو يزك بعد وياي – صرت مجنون وآنه ما بگالي راي

اهم للشكر مدري لو اهم للچاي – وهذا گبل كلَّه ينگضي بعانه

*************

يعصر النور ماظل بعد عندي حال – ما غيرك المفتي وشده مني البال

الله ايساعد المفلس وعنده اعيال – لو صار الغني ياناس جيرانه

***************

يعصر النور والخباز بي حاله - يخبطه للطحين انخاله واسحاله

اتصيح اعلى الخبز ميديرلك باله – والمذهوب ما يرحم الجوعانه

******************

يعصر النور خليت الگلب ممرود – انخه ابصالح وانخه المشكر هود

مامش عجم تلفي اتزورهم وهنود – والعُرْبي اليجينه انزوره مجانه

*****************

يعصر النور يحچي العربي والكردي – من فُگري دمعتي تنـزل ابخدي

مگصودك ابيعن مسجد الهندي – وبفلوسه اگوم اوفي الديانه

**************

هم هاي ابكتب تاريخ مذكوره – عصر النورعنه منحجب نوره علينه الدهر كوَّر ظُلْمه وجوره – ولسهام النوايب صرت نيشانه

****************

گلي اشبعد منها وتخلص المده – من هذا العصر نخلص وهل شِدَّه

بشرني الفكر يمته يذب جَرده – ويمته نجلي همّ الفگر واحزانه

**************************

لتلوم الحچه وياي ما ينلام – حربك صار ويه احسين بن گسّام

اريد وياك احچي وارد اشك الخام – نورك غاب چنّك صرت جنگانه

**************