للعباس ع --- بالشهامه انته آيه
 

للعباس ع

..............
المستهل
..........
بالشهامه انته آيه --- خويه يانسمة هوايه

ويه أمك آنه أباريلك عمر

شكثر دللتك يعباس شكثر

يبو فاضل --- يبو فاضل

......................

ياگمر خوّه بسمائي عاشت اوياك الشمس

بيت واحد من جمعنه بالحنان وحُب نحس

من محبه وعطف ابويه ويه أخوتي نلتمس

بزغرك وبيك الشهامه طيبه تملكها النفس

بيك كل خصله أمن اشوفك --- نشمي مكتوب بچفوفك

بليل همي من اعاينلك بدر

شكثر دللتك يعباس شكثر

يبو فاضل --- يبو فاضل

.............................................2

عشت هاي اسنين عمرك أبد متفارگ الي

گمت اتباها بمقامك بين ناسي وكل هلي

بهيبتك مهيوبه آنه ومن تگول ادللي

بوجهك انظر عيني لمن خويه تشتاگ العلي

أكبر أمن الكون گلبك --- الي بگد الدنيه حُبك

چنت من انخاك متقدم عذر

شكثر دللتك يعباس شكثر

يبو فاضل --- يبو فاضل

...............................................3

تذكرت فد يوم انته ويه ابويه بالحرب

أسد متهمه الجيوش او لاكتايب من يطب

شلون عالفرسان وحدك لمن اگطعت الدرب

وعيني من تتاخر انته اعليك ينشدني الگلب

بيك اشم عطر الأخوّه --- وغيرتك ويه المروه

ومن صبر گلبي چنت تاخذ صبر

شكثر دللتك يعباس شكثر

يوب فاضل --- يبو فاضل

.........................................4

ويه الحسين امن اشوفك گاعد بهيبة جبل

وچان اخوك حسين ينظر الك وبعينه الامل

انته تحمي حد خواتك لو المايرحم وصل

وگالّك فد يوم اختك زينب بشيمة بطل

وآنه مطمنه أخويه --- كل صفه عنده امن أبويه

بالحرب كرار مثله من يكر

شكثر دللتك يعباس اشكثر

يبو فاضل --- يبو فاضل

........................................5

چنت متفاركني خويه وحُبك شكبره بعد

وچنت اگولن يوفي تعبي وأبد مايخلف وعد

صدگ لن يوم الطفوف وأنته باقي عالعهد

كفو ماقصر أخويه ولاخلف وعده أبد

انطيتني ياخويه عينك --- ايسارك فديته ويمينك

وبوجودك ماگدر عسكر يمر

شكثر دللتك يعباس شكثر

يبو فاضل -- يبو فاضل

..............................................6

ظلت الحسرات بيه من رحت ماعودت

ولا گلتلك ماي اريد وكلشي منك ماردت

للحسين امشيت گلبي يرجف اعليك أنشدت

گال أخويه عالشريعه يمه بدموعي أكعدت

گمت اواسي حسين اصبره --- منكسر ياخويه ظهره

وگلبي مكسور وبعد ماينجبر

شكثر دللتك يعباس شكثر

يبو فاضل --- يبو فاضل

-----
سيد عدنان الحمامي