بسمه تعالى


سلام عليكم

--

--

--


برير وجون -- شيگولون -- الموت الموت ميهمنه

--

الك انصار من انصار -- لو صار الطعن تصمد

تمطر موت من تغتاض -- عواصف من تهب ترعد

تطگ بركان بالميدان -- منهم كل جسر يشرد

عابس لو حبيب او جون -- منهم ياشجاع اتعد

ميهابون -- ويضحون -- كل واحد نذر دمه

--

يحسين الشهم طبعه -- كل صعبه يلاويها

وانصارك يبو السجاد -- غير العزم مابيها

باچر والحرب لوصار -- سور أرماح تلگيها

الك مختارهم ربنه -- أهموم البيك تجليها

عد عيناك . كلنه اوياك .. انصارك يبو اليمه

--

يحسين الكفاح ايريد -- جدم الثابت وميزل

ابشفرت صارمه الابدان -- ايگوم الروسها يعزل

وحوافر خيلها امن الخوف -- اتغوص بگاعها وتنزل

وبيهم ينفجر بركان -- الدنيه وكونها ايزلزل

هالاصحاب -- ليوث الغاب -- عدهم للنصر همه

--

كلها اتعاضدت يحسين -- ارواح ابجسد واحد

قائدهم شهم معروف -- حبيب الزاهد العابد

حامل راية الايمان -- بيها للنصر رايد

يفدي عمره دونك راد -- بأشرف ملحمه ايجاهد

حسم نصره -- بدمه نحره -- عمره لجلك ايقدمه

--

باچر من تهب الريح -- وعج الخيل بالميدان

اتشاهد كل صوارمها -- حممها اتصبها والنيران

ومشراد الزلم منهم -- الخوف ايموّت الفرسان

وعسكرهم يبو السجاد -- بيد اهل الشرف ينهان

صبح باچر -- العدو حاير -- عليهم تنزل النقمه

--

من صار الطعن بحراب -- وصدور النشامه اتصد

واحد من بعد واحد -- ابعزمه اعله المنايا ايهد

وبروس الرذيله اتشوف -- واحدهم غده يحصد

وگامت هالرگاب اتطيح -- والسيف النصر تسجد

هاي ابطال -- تهز اجبال -- واحدهم صبح قمه

--

سيد عدنان الحمامي