الشاعر عراق السعداوي
10-15-2011, 03:40 PM
سبق وان وعدتكم ان اجلب لكم القصائد التي دخلت في المسابقة التي اقامها
منتدى النخبة للشعر الشعبي على موقعه الالكتروني
الشاعر عمر الحسيني //السماوه
القصيدة رقم ( 1 )
سيد ما يشور
سيد ما يشور هذا ما ينــــــزار
معروفة الرواية لكل بشر يقره
و ثبت سيد محمد يستحق ينزار
من شفنه كتالة معاشر الحفره
من خله الذياب تصير كلهه اغنام
من بوجوهم كله انكلب سطره
من ردد ال (كلا) اعله الملأ ما خاف
من بصوته هز العالم بأسره
من بعينه شاف الدين راح يموت
وكام بكل شجاعه انطاه من عمره
من شاف اليتامه و رد علي الكرار
من عيدو بسمه و تركو الحسره
شكد نامو بصدره وهو صدر الدين
و لمن مات نامو كلهم بكبره
من اذكر السيد والله احيرن بي
اذا هو العراق اتقدر بقدره
انولد عالم السيد عكس كل الناس
السيد صار عالم كبل لا يقره
المرجع يقره حته الوادم يقلدوه
بس سيد الصدر عالم عله الفطره
عاش بكل كلب يحمل طهاره و طيب
و مات و ظل يعيش بجوعة الفقره
جان الناس تلحظ نور من يفوت
و الوجوه الحزينه تشوفه جن بشره
مو معصوم ادري و ما كلت معصوم
واذا معصوم اكولن تنحسب كفره
السيد آيه من قرآن أهل البيت
ولو هو إبحرهم ينحسب قطره
بس قطرة شرف غركت كل الكون
وغيوم الاسلام بدينهه تمطره
السيد عراقي بكلشي و اجزم هاي
و بهذا الوطن ما ينمسح ذكره
بعوجيته العراق اتجه وكت الضيج
و جان اعله المصاب السيد يصبره
تره محمد صدر غيّر نفوس هواي
اجانه بماي قوه و خوفنه الجمره
زرع بينه الشجاعه بوكت يزرع خوف
و سكاهه بصوت (كلا) و نبتت البذره
بيده الجمعه صارت اشد جمعة خوف
بس مو بينه لا بالطاغيه و قصره
صرخ صرخت أسد و لهذا اسمه الليث
و سمع صوته الوطن من زاخو للبصره
انتشل من الأثم ناس بكثر ما ناس
جانت لليوعي الناس منتظره
بكبر ما ظلمه جانت نايمه بكل عين
وي سيد محمد خضرت كمره
قدس سره ليش نكول لمن مات
لأن قدسيته سر و حارو بسره
حارب طاغيه و معروفه جان إوحيد
و رسم لوحة ثبات و ما رجف مره
و ما ظنهه عجيبه و خل اكلكم ليش
لأن حيدر أبوه و أمه الزهره
الشاعر عراق السعداوي
10-15-2011, 03:45 PM
الشاعر علي جبر
القصيدة رقم ( 2 )
صدر العراق
رغم جَيْت الرسايل ليك مــــــــــولاي
ورغم ماتدري بيه الكوفه خوانه
ورغم ماتدري كطعو راس الحسين
ورغم كل الجره لمسلــــم وصبيانه
دعوك النصرتك ياصدر العْــــــــراق
وتوابه اصبحت ياصدر كوفانـــــه
سيفك عصتك والمنبر اكحيـــــــــــل
درع شال الجفن والجمعه صيوانه
الا من ناصرٍ بالكــــــــــــوفه ناديت
ارتجف عرش الظلم وانهدت اركانه
هبينه ال نصرْتك نصـــــــــرة الدين
عله حبك ياصدر تشهد ضحـــايانه
جنت بالكوفه تخطب كــــــلا شيطان
ارتجف حزب البعث والقصد شيطانه
سقطت ابجمعْتك حــــــــــــكم صدام
مو امريكا ادري النـــــــاس غلطانه
امريكا اجت من طاح صـــــــــــــدام
تلم حزب البعث وتكثر اعـــــــــــوانه
أنته اللــــــــيث الابيض يبن الاحرار
وبسلـــــــطه وحكم مالثـــكــ اردانه
ياصدر الشعب محتاجــــــــــك اليوم
تمسح دمعته وتخفـــف احزانــــــه
ياصـــــــــدر الشعب مظلوم مهموم
ومافرحه اللفـــــت ياصدر لحضانه
ياصدر الصنم انزاح اله اسنيـــــــن
وفرحنه ابطيحته وياريتك ويــــــانه
ولو نفس الوضع بس الصنم طاح
وظلت زمرته واتبـــــــاعه واعوانه
ياصــــــــدر اشأخبرك يبن الاطياب
الشعب كله ابسفينه وماكو سفانه
غضب ربك كَرب ياصـــــدر ندريه
صعدناهه السفينه ونوح ما جانــــه
يكَول اشويه اصبرو الفرج محتوم
شننطر يافرج مو وصل طوفانـــــه
وياصدر التداعي ابدمــــــك اهواي
ياحزب التجيله يصيــــــــــح مولانه
عَله حب الصدر نبقه احنه للموت
معجزته ابدماءه السالت احيــــــــانه
عَله درب الحسين الصدرمن ثار
الكرامه رايته و(هيهات)عــــــــنوانه
ترف وجنوده جانت بس حمامات
وبكلمة حبيبـــــــــــــي رهب عدوانه
الشاعر عراق السعداوي
10-15-2011, 03:46 PM
الشاعر ناظم الفضلي
القصيدة رقم ( 3 )
ومضة ...
كل حسين يظهر بالزمن ياناس * يطلع له يزيد يقتله بانصاره
بعد ما ينقتل يطلع اله مختـــار * ربك ايده كي ياخذ بثــــــاره
ــــــــــــــــــــــــــ
القصيدة .....
جـم مختار عدنه يذكره التاريخ يالله وياي الهم نلفت الانظار
واضح عندك انته تكول واحد جان بعد حسين حين القام باخذ الثار
هذا العنه كال المرتضى الضرغام هذا اللي يفرِّح عترة المختار
بعلمة وفطنته وبقوته معروف وصاحب للكياسة وطيب الاسرار
هذا الينتقم من آال اميه يكوم بثار حسين ابني وصحبته الانصار
وثاني حسين محيي الجمعة في كوفان خرج يعدل الامة عن طريق النار
محمد صادق اسمه الهز الامريكان من ال الصدر عالظلم لمن ثار
هدام العراق (يزيد ) ماخذ دور وحزب البعث جانوا جيشه الجرار
من شافوا السيد صار يهدي الناس واصبح على الدولة مصدر الاخطار
صفّوه من الدنيا وغاب ذاك النور وعليه صبّينه مدمع ليل ويا نهار
بعدك ياصدر مادام حكم الجور وشوف الزمن بالظلام لمن دار
يحسين العصر يمحمد المظلوم مختارك يخوض ويا المنايه غمار
مختار العصر بالثورة لمن قام سيد مقتدى الجابه قوى الاشرار
ماضاعت دمائك ياشهيد الدين ومن ال الصدر ربك بعث مختار
وهذا حسين ثالث يخوتي الطيبين في عين التمر درب الشهاده اختار
مصلح للقضاء وغير العادات بهدف واضح حقيقي ماعليه غبار
من شاف الامور تزود سوءً كام يدعو الناس تترك منهج الفجار
وبفضله اهتدت الاف من الناس شعار حسين يحمل لا للاستكبار
احيا بثورته كم سنَّة للمختار وايقض هالضمير الغافي وسط العار
جيش ابن الدعية بكل زمن موجود وابن زياد عدنه وشمر والحجار
وعدنه حرمله يرمي الاشاعة سهام وخولي الاصبحي للفتنه يشعل نار
ويزيد القضاء بقتلة افتى اليوم لانه رفض يركع للظلم والعار
يبو اسحاق انهض منه راح حسين لحسين القضاء انهض ونادي الثار
اظن الان انته تهيئ الاسباب وتجمع اصحابك نخبة الايثار
صار شهور احنه انتاني ملهوفين لثار الشيخ نرقب طلعة المختار
الشاعر عراق السعداوي
10-15-2011, 03:48 PM
الشاعر علي الصبيحاوي
القصيدة رقم ( 4 )
جيبُ الصدرِ من عجبَ السماءِ
لهُ في كلُ شبرِ كربلاءِ
الا يايــها القــلبُ المـــعنى
بمـــا تســتفتــح فيــهِ الــرثاءِ
عزاءاً قد نصبنا والمراثي
وهذا القلبُ مفضوح العزائي
رخاء الدين في تلكَ الليالي
وبعد الصدر مقطوع الرخاءِ
رجاء الناس في كف المنايا
وسالَ الدمُ من ذاكَ الرجائي
عشقنا الصدرُ عشقاً لايضاها
وصبت فينا اللام البلائي
ومـا للعاشقِ غير التصبِر
وحبيباً زادَ حــباً والــوفــائي
عشكتك موعشك عشك المجانين
وصبر بالكلب سعة غيابك
اجيك البابك واوصل حيل مشتاك
يدك الكلب كبل ايدي عله بابك
جوابك مااريده ادري شتكول
اشوفك ماردت اسمع جوابك
احبك يالصدر لاليله لاقيس
يامجنون كدي يحب خطابك
مااكدر اعوفك مكدر انساك
شلون ا نساك وبكلبي عذابك
اريدك ليله وحده بلكت اتعود
واكلك يالصدر شاهد صحابك
تخليني اشوفك طال الغياب
وشيلن حفنه من كومت مصابك
الف عالوجه بينه اتلوج السنون
وتطم عين الجذب لمحت سرابك
تعال وشوفنه شلون الوكت صار
وعلينه اتحزم ونفذ حسابك
اكلك مااكلك كلشي تدريه
عدك كالعلم رغماً غيابك
الحيايه تلونت لبست عمامات
ودفنت روحهه اباقدس اترابك
علينه اتحزمت مكلوبه افات
كلهه الجانت اتجدي اعله بابك
يريت اتعود وانته اتشوف الاحوال
ياهو الشايل ابجفه كتابك
من يوم الطحت لليوم محتار
من شفت الدمه صاير خضابك
فضلك ياصدر عالناس منكر ..؟؟
اسف وصفيت عالتربان منكر
هم انته مثلنه ايجيك منكر؟؟
يجيك اشينشدك عن ياقضيه
اضن منكر يطيح ايبوس جدماك ؟؟
ويشكر لللاله ابيوم جدماك
صفت افراح وصط السمه جدماك ؟؟؟
لجن احزان عمت عالبريه
اكول الصدر ميت والله خجلان
شلون ا تموت والدنيه تهابك
اذا غمضت عينك يعني شلون
ياهو البعدك ايحل القضيه
اذا ربعك غدو حقك ينكرون
ونكرو حته اقوال الوصيه
تحت منبر الك جانو يصلون
صارو هالوكت جن ا ل اميه
ربعك كلهه ربعك صاروا سنون
لاجت بيهه انصار الحميه
وادم عالكراسي وكلبت الكون
اوادم عالخمس والاعلميه
كل اليوم الجلد يتغير ابلون
شمادار الوكت تندار هيه
على اسمك عناوين اليكتبون
وعلى نهجك يسيد طائفيه
اشوياهو التكظه وياك مدفون
وصار اسمك عله السلطه هويه
اجذبهم لان كلهم يجذبون
وكلهم بالمزابل مرميه
كلهم من منابرهم ينزلون
لو رد الصدر وبجفه عوجيه
مراجع صارو الجانو يقلدون
وهم عباددنيه وغدا مقضيه
يسيد مقتدى لاتحزن اتهون
ماتبقه اعله حال الدنيه وقتيه
ابنك من دماء البيك معجون
اشهد كل حياتك اعليك مفنيه
ماخان الامانه ويه اليخونون
ولادور كراسي وسلطه عاريه
تحزم بالمراجل فوك الضنون
واسمك بيه رفع رايات حربيه
الشاعر عراق السعداوي
10-15-2011, 03:48 PM
الشاعر ابو يقين الصالحي
القصيدة رقم ( 5 )
(( السيد الشهيدالصدر ))
......................
ياسيدالصدر حايـر شوصــــف بيـك
وبيش أبدي القصيدة وبيش آقفلهـه
حياتك ياشعر يحصيها يامــــــــولاي
وياصـدر وعجـز يكــــــــدر يفصّلهه
أنه إشمنهي القصيدة وأختم الابيات
آخــر بيت يطلـع عـنــــــــدي أولهـه
ياشاعـر يوصفك وإنته أبوالعـرفــان
وأحكـام الفضاء وفـقـهــه واصلهـه
لاشفناك يوم إنته إصعـــــدت ليفـوك
ولا نزلـت مـراكب حتـــــــى تسألهـه
إذن موبس صدر في هالوجود إثنين
إنته وبالفضـاء يوجد صــــــدر إلهه
ومركـــــز إتصالك كوفتك مـــــولاي
من عــــــدها الإشارة إبدقة ترسلهه
وموجاتك عـلَّن كونن جمعة هنــــاك
صــــــدرية إبجمعتك إتصـــــال إلهه
(ناسا )إحتارت و(دسكيفري) المذهول
جي لنهه شفــــــرتك صعبة مدخلهــــه
سنَّيت التواضـــــع والتواضــــع بـيــك
ثــــــورة إعله التكبر ثــــــورة حولهه
إبفعلك طبقيته إمســـــــاوه بين الناس
وإيدك مارضيت أحــــــــــد يقبلهــــــه
ودنيـا الأقبلت يمَّك يصــــــــــدر الدين
آليت إعـلــه نفســـــك أن تجاملهــــــه
يمضيق الخناق إعله الذنـــــوب هناك
جفك للذنــــــــــوب إبتوبــــــــه كبلهه
جفك ياصـــــــــــــدر ياطالب الإصلاح
للناس التسيـر إبعـــــــــــــوج عدلهـه
شياطين الغــــــــــواية آيست مــولاي
إبكاعك مابقت عـيشــة وسكــــن إلهه
ياصـــوت الحقيقـة الخرسيت أصوات
بيك آمن يسيد حتـــــى جاهلهــــــــــه
إنته أعظم قيادي بصوته هز إعروش
( كلا ) إبهالزمن بس إنته قائلهـــــــه
وأمرك من صدرأمرالمشي بشعبــــان
لجـــدام العفالـــق والبعـــث شلهــــــه
ياخامس سفيـــــر وللسفارة إشــروط
لكل دولــــــة سفيـــــــــر اللي يمثلهه
إذن دولت إمامـــــــي المنتظر مولاي
لابد من سفـــــــــــارة وقنصلية إلهه
وأقسملك قســــــم بالخالـــق المعبود
يصــــدر الهل سفــــارة إنته قنصلها
الشاعر عراق السعداوي
10-15-2011, 03:50 PM
الشاعر يوسف عبدالكريم
القصيدة رقم ( 6 )
ليث الابيض
ــــــــــــــــــــــــــــــــــــ
نشدوني عن صدرنة ليث الابيض
وكلولي بصراحة كول التعرفه
كتلهم اية وفريضة شاع الصيت
ومبين صدرنة بمسجد الكوفه
وكتلهم بحر وجروفة طوفان
تحدى المرادي وصاحب العرفه
سفن غركت ابحره شايل زود
اوتحت عمقة غطت اكحوفه
كتلهم طرز اعلجفنة طاري الموت
اولذالك صدرنة صار سالوفه
رواية اكثر من الف ليلة وليلة
ذيج قصة وهاي حكمة موصوفه
وكتلهم مثل تتعله بيه الناس
بيرغ كرامه مطرزة حروفه
قطعة بيضة امنل الحريراحاه
وسمهه محمد بالوطن ملفوفه
الك ياتاج البسالة البخت ينكال
ويافقه الفضاء وفتوة معروفه
علمك وصل لجن وشتهد بيه
وموعجيبة هاي عدنه مألوفه
ياصاحب الغيبة اوكاتب الموعود
وياعمامة صدك علم مصفوفه
محتار النشد عنك يصدر الدين
ونتة الشمس ماظنهه مكسوفه
يصنديد الاصول ومرسه للئايات
اويابوارج علم يكسر ابخوفه
وكتلهم منكثر علمة صار بحور
ولهسة الشواطي تدرس حروفه
مثلك ماشفت منه خاف الخوف
وسلا حك جفن بيدك اتروفه
غيرك ماشفنة صله وصط الموت
تره بس انتة ياسيدي انشوفه
وغيرك مابرز تشهدلك الا يام
وشهد لصدر ماباجت سيوفة
دومه ايصيح كلا كلا للطغيان
وحنة كلنة ابصيحة ملهوفه
الشاعر عراق السعداوي
10-15-2011, 03:52 PM
الشاعر علي عويز
القصيدة رقم (7 )
حيدر التسعين
وينك حيدر التسعين شو ما جيت ؟
الكوفه مسرجه ومعروفه ناصيتك
ما تكدر تجينه ارجوك وي الريح
لصدور التضد مدلنه عوجيتك
غيرك من مشوا عافو قصور املاك
وانت الفين جانت كلهه خرجيتك
يتامه الكوفه جانت من تدك الباب
ما عدك خبز .. تنطيهه عافيتك
امنيتك اضن مايبقه كل جوعان
مو صدام يسقط جانت امنيتك
وصلاة الجمعه جانت عسكر وتجنيد
وابد ما نختلف بأحوال حربيتك
دخت باجر الاهك بالحشر شيكول
وين اعمامتك لو وين بيريتك ؟
اضل شما اشوفك لقطه من حسين
الحجه المنتظر مسؤول تربيتك
ولمن بالكوفه مرت زينب الحوراء
لو موجود بيهه يجوز ناخيتك
يا اول معمم وي علي تساويت
جياع الشعب مولاي حاشيتك
منو مثلك نزل لسكافي والعطار ؟
لوساط الغجر وصلت شعبيتك
ولبو البسطيه لو فكر تركهه تكول
حبيبي تعوفني ولتعوف بسطيتك
لذلك من متت طبرولك الهامات
وشفت مشايه تمشي بأربعينيتك
وصرخ حبل المشانق نام صدر الدين
من كد الشنق مليت صدريتك
دروا بيك المنيه تروح وترد ليك
واعليهه أتامر جنهه جاريتك
حاكوهه الدسائس بالنجف مولاي
اسولف بالاسم من راد تصفيتك ؟
رصاصات البعث جانلهن التنفيذ
بس جان الحكم بأقلام عاصيتك
علي السجاد انته وذوله جيش الشام
بس ما نفتهم يا شام سابيتك
من تجبل عليهم جانوا يرجفون
يمكن راية العباس خاجيتك
باجر وره الصيحه يصرخ اسرافيل
يابحر النجف طلعلي بعثيتك
غدا يوم الحشر تمشي بقرب زهراء
جي تشبه ابنهه افكار ثوريتك
بصينيت البتول جفوف للعباس
وامصيفي ومؤمل بيهه صينيتك
الشاعر عراق السعداوي
10-15-2011, 03:53 PM
الشاعر عمار الشريفي
القصيدة رقم ( 8 )
حلم شاعر
منين ما اصدن اشوفك !
بكلشي اشوفك !
بسورة الاحزاب اشوفك !
بتربة مصلايتي .. بوضع القنوت
بالكمر .. بالماي .. بالحايط اشوفك
بكلشي اشوفك
بحسرة الفقرة اذا مراها عيد
بلهفة الايتام للثوب الجديد
بكل عصر مولاي والحاكم يزيد !
بدمعة امي بمعتقل .. تترجه شرطي
لشوفتي وتحبله ايد
وما سحبهه تذكريتك!
بكلشي اشوفك !
بصفنة المظلوم والظالم اخوه !
بالوليد العمره ساعه ويتموه !
بشهكة ام الواحد وعدموا ابنهه !
والذنب جي صله جمعه !
وباعت الجلاب لفلوس الجفن !
بكلشي اشوفك
بالغريب العاش كوه .. ومات حسرة اعله الوطن
بكلشي اشوفك
باليتيمه الفرحت بترجية خيط
بالاماني الشيبت راس الطفل !
من يجي العام الدراسي
يكعد وايده اعله خده !
وكل امانيه بسيطه
يريدله بلوز اعله كده !
بكلشي اشوفك !
بكل شريفه الماتت وماعدهه بيت !
وعاشت بطرك العبايه الساترتهه
وللشرف تحسبهه بيت !
بكل عفيفه الماحنه اعله العوز جفهه !
بالرصيف الكسر اضلوع الفقير
بكل سياسي الساوم المنصب مقابيل الضمير !
كل سياسي المامسح روس اليتامه بلا ضمير !
وكل سياسي العنده ثروة بلا ضمير
والنتيجه يا محمد
انت دستور الفقير
اوين ما اصدن اشوفك
الشاعر عراق السعداوي
10-15-2011, 03:54 PM
الشاعر منصور البدر
القصيدة رقم ( 9 )
الصدر المقدس
عرك وجه القصيده ومن عرك معذور
يانص التجرأ يوصــــــل النــــصه
وياكلمه التوصف عشر من معشار
لو ياعقل ذاك اليكــــدر يشخـــصه
الوصف بيك أنس نور وابد ماانشاف
شنهي النور هذا وشـنهي البنصه
موسى بجفه عصه اتحولت ثعبان
وانته اربع ليوث ابجــــفك العصه
صرت حسين انته ومنبرك ميمون
وصوتك على الظالم جان ما ينصه
ولأن كلا شعارك جان للطغيان
ردت كربلــــه وانـــعادت القــــصه
شبه لهم موتك ساعة الصابوك
يالكل الضــــماير بيـــهه الك حصه
ولأن طبعك حسيني ورحمه بين الناس
حته الحاربــــوك انطيــــتهم فرصه
وحركت الضماير في زمان الموت
وخليت العــــلم عالعــــلم يتـــقصه
وزاوجت الشجاعه بصبر من جلمود
وانولــــدت زلم عالـــموت تتوصه
مات الخجل عدنه ومات كل انصاف
ومن صلت جمعــتك عركت الكصه
علمت الظهر يتكابح ويه السوط
وعلمت الفلـــح ما ترضه بالكرصه
والسان الرجال الما يلاكي السيف
علمت الســـنون اتكــومله اتكصه
يا اول كبر ظل ينحسبله احساب
ومثل حسين كبرك فاطــمه اتطوفه
الكوفه ابغير شخصك جنهه بس اكراب
هيه اكراب وانته الســــيف للكوفه
ومن اصفن عليك ابعيني مو انسان
مناره امعممه وبالجــــفن ملفوفه
أقسم بالشهيد احسين يامولاي
وبراعي الكفاله الكـــطعو اجفوفه
مسراك السراط ونهجك انته الدين
وترك دينه التورط نهجــك ايعوفه
الشاعر عراق السعداوي
10-15-2011, 03:54 PM
القصيدة رقم ( 10 )
((الصدر في الصدور لافي السطور))
بعيني لوحة بحجي
ترسم عراق وصدر
أبلا طبيعة وحلم
أسمع قوافي الرسم مابيهه لوحة عجز
محبارة صار الدمع كل دمعة توكع صدر
اللوحة نورس ملك
والريشة شيبة نبي
بالكوفة عايش صدر بوصافة شايل علي
الجمعة تلبس جفن تصرخ حناجر غضب
الصدر يكتب صدر موش احنة نكتب صدر
العوجية جانت شمس
والثورة طفلة سبي
الصدر لابس وطن مامرة فرع شعب
الصدر عالم علم
مامرة جاور علي
ابجفة بصمة دمع من دجلة خضر عطش
بالقدرة ماي الرسم كل قطرة كبر السمة
تنزل مواكب خبز
شيباتة خد النبي
بايسهه وحي العرش
بشفافة رمح ونحر كل جلمة طف وسبط
بجفوفة سفرة علي
فارشهه بارض الفقر
ومن صوته جان الصدر يصدح شرار الرعد
من دمعة شاهد وطن يفضح جحيم الزمن
اعمامة جانت حضن يم راسي غافي الوطن
والطلقة طافت جرح من كلبة تاخذ حرز
الصدر كعبة ورد
بانفاسة عايش هوى وكل خطبه نشتم ورد
ولونة بياض الشمس كل شعرة جانت نجم
وطولة بقياس الفقر كل جمرة جانت برد
من ثوبة غطة الارض وردانة خيمة شرف
وصوتة بحناجر ملك يخرق دماء الحقد
بلسانة دولة علي
خارطتة وجه الصدر
من ربة لابس جفن
وبجدامة راكع جبل
بفكارة سقط ضلم كل مرة يصلب نبي
منهاجة اترف علم للعقلة حاكم فقر
هيهات جانت صدى
لودجلة مرة انتخت يفزع صدرنة بندى
واسمع سوالف ورق
تندهني ارسم عدل
مو جلمة توصف صدر لوحات لازم تحط
يرسمهه دمك جفن واتكبع انه بجفن
علكني فوك الورد يشتم صدرنة الهوى
كلشي على طاري الصدر ياخذ تحية الوطن
بترابي نايم جبل
مكبرتة كلب العقل ايتام جانت تلم
حبيتك انه بكفر
من مثلي عاشك بشر
دافلة كلب بكبر الموتة منه استحت
موسوعة دم الصدر دونهه عقل الجهل
جتفني حبل الشمس كطعهه رمش الصدر
يم راسة ليل انكلب رجعهه حيدر صدر
تلزمني رعشة سعف
ينفضههه هدم النخل
يم بابي دنية ارملة طلكههه كلب الصدر
سمتني ابن الصدر
سألتني صدرك نبي
كلتلهه يمكن علي
جاوبهه وحي الشعر
قران دم الصدر
قران دم الصدر
الشاعر عراق السعداوي
10-15-2011, 03:55 PM
الشاعر حميد الحمراني
القصيدة رقم ( 11 )
((((خطارك الموت))))
كلت مشوار وارجع واهلك امتانيك ,,,,,, على احبابك واهلك طال مشوارك
يالواثق بنفسك من تدوس الكاع ,,,,,, يلفاضح اعداك بكتمة اسراك
صراع بشهكتك للنفس يا مولاي ,,,,,, من تستغفر وي ابليس تتعارك
جنت تلبس بياض الجفن كبل الموت ,,,,,, حتى وي الشعب بالموت تتشارك
بمتونك طلعلك شيب من الضيم ,,,,,, ميكفى الجفن شيبك على كدارك
انه اعمة جنت وافتحت عيني وياك ,,,,,, رد الشوف الية بشمعة افكارك
ولان كلك امان ولذنة بيك اسنين ,,,,,, اجة حتى الحمام يلوذ بكتارك
احييت الضمير المات كبل الموت ,,,,,, وحي لسة الضمير بذمة انصارك
ثوارك زلم شبعوا حلك الموت ,,,,,, يفزعولك فشك لو تنخه ثوارك
ابعوجيتك وسيفك دخلتهه انذار ,,,,,, رجف عرش الطغاة بصيحة انذارك
منشارك يحز ابركبة الهدام ,,,,,, ورغم ما وحدك بس حاد منشارك
دوخت النظام وزمرة التكفير ,,,,,, وصلت صولت علي وجمعتك فقارك
يلطولك بحر والكرم صيتك جان ,,,,,, سفنهم شيبت ماوصلت بحارك
خطارك الموت وكتله عد عيناك ,,,,,, الحسن جدك يرد معقوله خطارك؟
جاورت أبمماتك جدك الكرار ,,,,,, ولمع كبة علي واصل لحد دارك
محسود عله كبرك حته وكت الموت ,,,,,, لأن حامي الدخيل اللي صبح جارك
وين انته صرت والطاغي اصبح وين ,,,,,, ويا مثكل رجل زواره زوارك؟
يشاعر جمعتك يمضحي لجل الدين ,,,,,, تصعد خشم خصمك تقره بشعارك
الشاعر عراق السعداوي
10-15-2011, 03:55 PM
الشاعر وسام البصري
القصيدة رقم ( 12 )
درب الكماط
فجــر دمعاتـــنه يخضـــــب التجاعيد
فوك وجوهنه مـــــن المستــحه عتاب
ليل من الشوارع جبـــنه بالـــــــــدين
خوف بيوتنه نشمه ويــه التــــــــراب
نخيط من الجرح بيبـــــــان الحلـــوك
كبل لا جف عدونه يغازل البــــــــاب
بتنه بطرك روح مرافكه المــــــــوت
وكت بيه الاستسبع رافــــــــــك ذياب
دفنه اســــــــرارنه بحضن التنــــانير
مثل دفنة شــــــــرف ما بين الاجناب
عله جروف الدمـــــع ما نلكه وجنات
لأن ماظل دمـــــــــــع علوجنه ينهاب
لكانه الشيب واحنــه بــــدرب الكماط
نوزع حكم للهم مـــــــال شيـــــــــاب
لحد ما طفح صوت الــــــوادم بغيض
وشد سروج صوته وذب النكـــــــاب
ورج حته الاعمه البين الاكبـــــــــور
وطلّع من اذان الخوف عطــــــــــاب
لكه الشارع عطش والمشرعه جفوف
والراس انشمر من ما لكه اصحـــاب
يتـــــــرادم حجينه بلهـــــــــجة عيون
لأن باذن السوالف كــــــاعده احزاب
امس نتوضه دم مـــــن الشــــــواجير
وعله كاع الفتن نصبنه محـــــــــراب
لحد ما طلع مـــــن الكـــــــوفه للعــيد
كمر بالمسجـــد وشـــــــر الحقد غاب
مراجل شمر بوجـــــــوه السيـــاسات
والثالوث فكره من الصــــــــدر خاب
قوائم للزلم مــــــــــن الجُمَع حــــــاك
وخله الاولويه لـــــجرحه مـــــا طاب
دفن بيده الجرح والجوع والـــــخوف
وزرع بيده الامل متتتتن رد الارهاب
سيفه بكل منصه يـــــــــــدمر جيوش
نهار اللابسه نشـــــم بــــــي فجر آب
اشوفه من الصبح بــــــي لون شعبان
سيفه من انشهر للعــــــــــاشر وطاب
لكه بليل الجمر منجــــــــــم شعارات
من طلعت شمس من ظلـــــهه ترتاب
سد حلوك جـــــــانت تزرع الغــــــام
بيهه تكتلو جـــــــم شـــــــايب وشاب
يجي لحضن اليتامه يــــــــوزع متون
عله جتافه الصعد مـا طـــاح , ينهاب
دفن روحه بحضــن راحات الجفوف
حته يشل جــــــــــــرح للآن ما طاب
اخذ عصات موســــــى الخسفة متون
مــــــن ذبهـه بحضنهم دفنــــة ركاب
لــــــم جرحه وكعــد ويه ابسط الناس
مــــا دور كــــــراسي وعاف الالقاب
شــــــــــــم ريحة عتب بجفوف الايام
واظــــن جان لظلمهن حاسب حساب
هـــــد صرح السقيفه بفزعة الصوت
رد الشــــــــــرك بيده من انكلب ناب
يــــــم مكسر الضحكه تشوفه مهيوب
يـــــــــم جرح اليتامه تشوفه بمصاب
دلــــــه المفردات بـــــــدرب الحسين
من يحجي السوالف لابســــــه حجاب
مد روحه سفينه بشاطي الجـــــــروح
من كل صنف مرهـــــم للجرح جاب
حد سيفه عله حضرة جــــوع الافكار
لحد الان سيفه مطـــــــــلك الكـــراب
ما مد جفه يم بـــــــاب الســــــلاطين
واذا مدهه اعتقد بجفوف حطــــــــاب
داس عروشهم بحروف سجــــــــــيل
عين الفتن بيهم من نطق صـــــــــاب
مو جلاد لكـــــــن طبــــــعه معروف
من يشوف كــــــــافر يسمع الـ (تاب)
حج عل حـــــــك وطاف بدمع الايتام
كلبه عله العــــــــراق من الكسر لاب
منهج حيــــــــدر وصـــــولات عباس
ردهه وفرش فوك التـــــربه الاسباب
دك للدين ثـــــــــــــايه بصبخة وجوه
وخله عله الهدايـــه النــــــاس تنساب
صدى صوت الرفـــض للآن مهيوب
رسم بل (لا) مـــــلامح فزعة اسراب
امــــان ونثر بـــــدروب المساكيـــــن
ولبّس للشجاعــــــــــــه بخطبته ثياب
دفع دمه ضريبة نشـــــــــر الاســـلام
وخله المرجــــــــله والزود طــــلاب
قد قبل الزعامــــــــه بحضرة الخوف
او رد وزع علينه الديــــــــــن بثواب
الفكر والعـلم والحــــــــق والبطولات
وسبيل الجنـــه وزع حــــجز واعناب
لكن واقع الـــــبي عشـــــــــــنه ميتين
كلما يجي المرســــــل كلنه جـــــذاب
صدكنه الســـــــراب وحجــيي الغيوم
ونمنه عله العطش والمــــــاي سجاب
دهر معروف بـــــس بذلــة النـــــاس
بشر ماتعرفلهه احســـــــــاب وكتـاب
راوونه الجحيــــــــــــم بهيئة اجيـــال
جيل يذبنه بالهم جــــــيل بمصــــــاب
الشاعر عراق السعداوي
10-15-2011, 03:56 PM
الشاعر صادق الصافي
القصيدة رقم ( 13 )
قصيدة المناجاة
عاينت اعله كبرك سيدي امنبعيد
يامنهل فكر والناس ترويها
او وصلت انه الحضرتك يالجنت ممنوع
او روحك طاهره ابيالهجه اناجيها
تذكرت الجفن والعصى والمحراب
اوشفت الجمعه تبجي اتريد راعيها
او صوتك من صرخت ابموجت الطغيان
هز اعروشها اوزحزح كراسيها
حجي اهوايه البكلبي اومالكه اليشرون
وانت اصل الحجي والجلمه تشريها
جايبلك عتب ياسيدي اياذيك
ثكيله احجايتي بس لازم احجيها
ترى اتراب الوطن داسوه الامريكان
او محتاره الخلك شنهي التسويها
000000000000000000000
انا محدود علمي اومن سواد الناس
مافرزن صرت عايش ابدوامه
شفت واحد معمم يم الامريكان
سلم عالامريكي اودنك الهامه
اشتعل بيه الغضب عاينت عالتاريخ
من هاي الحسين اوحركوا اخيامه
00000000000000000000
انا شيعي واظل لاخر نفس شيعي
اوسبع فدوات اروح الطاري العمامه
بس كون العمامه التنتفض بالغيض
لوثار الرصاص اتثور جدامه
العمامه الشريفه الماتبيع الناس
ولاعن حق تحيد اتخاف ظلامه
جاهيه العمامه الماتمثل الدين
كلمن يكدر ايلفله متر خامه
0000
موعيب المعمم صف رصاص ايشيل
اويتقدم شعب ويصير خدامه
جاهو الحسين ابيوم طف عاشور
تعمم يله شد للمعركه احزامه
انطيني يزينب صاح ابو السجاد
العمامه السحاب اوحضّري اللامه
000000
محمد ياصدر ياعمت عيني اعليك
كون اعيون عندك تشهد الحاله
جاهسه اوعلي رديتها العشرين
والعصا ابيمينك تنكلب فاله
اولميت الحجي او وحدت صف الناس
اوجان الينكتل ميّزت كتاله
كبل جانت زلم ترتجز عد عيناك
هنياله النزف للشعب هنياله
هسه الزلم شحت مدري شنهو الصار
مسروجه الشكر بس ماكو خيّاله
مثل اعمامتك ياصدر ماموجود
من عسعس وكتنه اتحولت هاله
وارفض كلشي ارفض كلشي مامقبول
الوطن من طاح محد كام تجّاله
0000000000
عذرا سيدي امنلجم اجروح البيك
وانا يم رسمك اوكف وانحني القامه
خايف سيدي لايغفل الناطور
واخاف امن الرعب تتجدد افلامه
واخاف اعله النخل عالماي عالناعور
واخف اعله الوطن تتلوث انسامه
واخاف امن المجاعه اترد علينه اردود
اوينشف هورنه اويطرد البلامه
واخاف امن البعث عاود علينه اردود
واخاف اعله الطفل لوذبحوا احلامه
واخاف انرد جديد انرافك الطاغوت
اوحسقيل اليهودي ايصير علامه
الشاعر عراق السعداوي
10-15-2011, 03:56 PM
الشاعر جلال البطاط
القصيدة رقم ( 14 )
الليث الابيض
انتة الليث الابيض والنعم من كَال
لان كلك بياض وداخلك جوهر
يالطلعت جبينك لؤلؤ وبلور
سبحان الجليل الخالق الصور
يبو كَلب الجبير الكلك انتة اعجاز
يالغز وجذب من كَال تتقسر
يالصبر جبل ما هزة كل الظيم
ومنو الصبر يسيد يوصل ويكَدر؟
عالذل ما تنام وطلكَت دنياك
حاربت الظلم والجور والمنكر
وغصبآ عالمنية البست جفن الموت
ونعشك سيدي صارالك المنبر
كل ظنهم تموت ومنهجك ننساه!
طفح بينة العشَك بركان وتفجر
لان اسمك نبض يسري برفيف الروح
وكلمن قلدك ربحان ما يخسر
واذا دم الحسين الغير التاريخ؟؟
تاريخ العراق بدمك اتغير
عاين سيدي فضل الشهادة اليوم
علامة بكل فرع تصويرك اتنور
يالطبعك صكَر وتعلة فوَك الغيم
كل طير ارتفعلك طاح وتكور
حملت هموم شعبك وانتة ابو الكلفات
لا مال الحمل لا جدمك اتعثر
صار اسمك رمز تتباهة بيه الناس
يانسل الامامة ويا شبل حيدر
لان اسم الصدر عنوان للابطال
ومن حقة ابمشيتة الصدري من يفخر
جبروك الاقامة اتصورو ننساك
وعلى ابوابك مشانق حطو العسكر
خاب الفال بيهم سيدي ابهاليوم
كل شعب العراق بشخصك اتصور
ما ضاع التعب يا سيدي وعيناك
بشيعتنة افتخر مولانة بالمحشر
مقابرنة الجماعي التشهدلنة اليوم
متحدين حتى بذبحة المنحر
وين الحاربوك اوين طاغيهم؟
تهدم كل عرشهم سيدي وضليت
واحدهم يفو لو باسمك اتذكر!!
الشاعر عراق السعداوي
10-15-2011, 03:57 PM
الشاعر السيد علي الميالي
القصيدة رقم ( 15 )
سورة الرحمن
مابين بين الوكت والنايبات وبين
فجر الهداية شفت مولاي نورك بان
اعتب صرت عالنظر واتحايل عله العين
معقولة صورة بشر في هيئة القرآن
شمس الله لبست جفن وتحزمت لأثنين
لو تهدي هاي الخلك لو تطرد الشيطان
زلزلت عرش الكفر لمن صحت يحسين
في يوم كلهه البشر خافت تسوي احسان
تدريبة دربك خطر بس ما كلت بعدين
تدنه المنية وصحت الآن ثم الآن
ماراوست دنيتك ما بين زين وشين
دربك عدل سيدي ما ترضة عالطغيان
حالك شبه جدتك من ترفع الجفين
ترفع عمامة علي وتدوس ابو سفيان
كل آيه والهه فضل بالتوبة لو بالتين
لكن فضل آيتك من سورة الرحمن
مثل اليصف الجنح واليصفك الجنحين
والتصف دونه البشر واليصفك البيبان
الحوزة جانت كبل تغفة ببرد تشرين
ونيسان مامش لجن جاب الصدر نيسان
مو اعمة بيدك عصى بس اليعرفك زين
يعرف نفع عصتك فجت بحر عميان
وين الكة مثلك عدل دليني اجيبه منين
هاليوم عكبك صبح جفة اعوج الميزان
زوركت عين الجرح ياموطن الصدرين
وجه الفرات انخبط ماية ويجدي الوان
ماتدري حته الدمع وكت المحاسب دين
وآنه الاطلبك صدر لتجيب ياهو الجان
يومية الك معمعة واحزاب بيك الفين
وما طلعو سيدي جندي من الامريكان
لبّسنه شيلة التفك يستحن ...عن العين
والجيلة للمنتخب والعيد والعرسان
وللحطوا اسمك جسر يعبر على الصوبين
مو منجل ومطرقه بل مطرقة وسندان
بيت القصيد الصدر والصدر ركن الدين
واسم الصدر بالشعر ينطي القصيدة لسان
متعوب وجه الصبح وعالخارطة النهرين
يجرن دمة علة الصدر من جمعة الاحزان
الشاعر عراق السعداوي
10-15-2011, 03:58 PM
الشاعر ناجح الجبوري
القصيدة رقم ( 16 )
ماحضيت بحضرتك جنت اعمة راي
ومن اجاني الشوف جنت انته بعيد ....
أوراحت افكاري البسيطة ...تبحر بعالم وصالك
بس جنت كلش بعيد ومالكيتك
أي نعم عايش زمانك وأحنة أموات بزمانك ...وأنته عايش
لسه عايش
بالجوامع صوت منبر
بالنخل عنكود أصفر ...أنته هيبه
أباب حيدر أنته قنبر
وي حسين ....وحرت بأمرك وي حسين
حر أشوفك ...مرة عابس
مرة ليلة تنوح يمك وأنته الاكبر
وي حسين ...أنته منحر
ومن أجاك السيف عاشك...(الموت عاشك )
تمدد السيف وي طولك محب والتف بحبيبة
ومن عرك شخصك دماء
ثورة خضر ...خضرة ثورة حقيقية بلباس الريح طارت
كعدت بصف النجم ...كعدت تناغي سهيل وتعاين علينة
ومن أجينة ...أخ لمن احنة اجينة
أحتارت الكاع بعطشنة
والله رادك تنزل تروي الارض ...وانته مخير
قررت بارض العرق تكون ماي
وضاعت الفكرة بخيالي ....وتاه بالي
عدنة نهرين وعليمن ...انته جاي
وفزت بروحي القصيدة ...بلمحة من شعر الهلاي
أقتباس (ندري بالعشرين ثورة )
وآني اكولن عدنة بالتسعين ثورة
أي نعم ثورة ضماير
واني حاير ...وانته حاضر
أنته يانقرة طبل بأذن الاصم ....مافهم معناك بس فكيت أذانة
المهم يمشي بخطاك
(خليهه بركبة عالم وأطلع منهه) مثل شعبي
سامعينة بكثر ماجوعان شعبي
بوكت جان وللأسف ....أنطت النسوان عالخبزة شرف
وحضر صوتك خبزة سمرة ...الترست بطون الجواعة
بي بخت خبز الشعير ....
الله خير ...الدنية خير ...وانته خير
أنته بس الرجع النكطة لهلهة..
بوكت جان شكد ملوك تعيش تيجان ومسائل وجب حلهه
أنته غيرة الله بيك تجسدت شخصك سماوي...
ومرة رادك الملائك حابة تصلي جماعة ... والرسالة تريد قائد
انته قائد
نزل اسمة بجف يمينك ونكلب شخصك مسيح ...وكمت تحي أمواتنه
تحي أموات الفكر
صاحب الشيبة البهية اليكضي ليلة لربة خاشع
خاطب الذوق الرفيع ...اليكضي ليلة بصاية الدف والنقر
مو عجيبة ...الله رحمة
عطشت الباب التودك وأنته زمزم ....
أنته مشروعك نبي بس الله خاتم .
جانزل جبريل يمك ...ما أبالغ دوم ينزل
ينزل يصلي جماعة ...جانزل قران بسمك
أسمة قرآن الجواعة
وحاربوك أهل الرسالة... حقهم القبلة درته
أنته عملة أم طرتين
ولذلك من حذو كتبة بزمانك للأسف محد لكاك
وأني أجيتك أعترفلك بالنبوة ...بالرسالة
ولأن شخصك غير عن أهل الرعاية ...لبس الدين العباية
وأنفرد عن الجماعة
أنفرد صلة جماعة
وجانت أفكاري بمجاعة
ومن جبت أسمك تغذت وأنته دور المجاعة
ولأن شخصيتك عظيمة ....بس جنت جدآ بسيط
راح أحاجيك أبساطة ...أبساطة ديرتي وبيتي القديم
أنته من جيت بمسلسل ...وأحنة تابعناك فطرة
وأخيرآ بالنهاية ...أبتدت عدنة الرواية
بس عليمن ...من جنت جدآ عميل
انته جنت شكد عميل ...
والله فقرة ....!
انته ياأول عميل يضحي بطيور السلامة
وجانت الجمعة حمامة ....تدري طارت من رحت هاي الحمامة
تريدك تعاود علينة وتبتدي دور العمالة من جديد
أي نعم هذا التريدة
أديان غيرك بيهه همة ...بس فقط دينك حديد
وأخيرآ راح أسلم
ننزل بيوم القيامة ...وننتظر كلنة الشفاعة
والعرق الوحدة واكف ...
بيدة قرطاس الشفاعة ...من محمد, فاطمة ,الكرار شاهد
موقع بأيدة الحسين
والعراق لهسة واكف منتظر أمر الاله
منتظر صدر المقدس ...يوكف بهيئة أله
وينحني كبالة العرق
يمسح بأيدة عله راسة
ومن بعدهه يفوت سالم .
الشاعر عراق السعداوي
10-15-2011, 04:03 PM
علما ان هذه المسابقة اقامها
منتدى النخبة للشعر الشعبي / على الكوكل
او الرابط
http://www.nokhbaa.com/vb/index.php
المدير العام // الشاعر عراق السعداوي
مؤسس المنتدى // الشاعر علي الملا الخزاعي
الفائزين بالمسابقة
1-القصيدة السابعه / علي عويز
-القصيدةالثانيه عشره/ وسام البصري
-القصيده السادسه عشره/ ناحج الجبوري
الجوائز
الفائز الاول 10,000دينار
الفائز الثاني 75,000دينار
الفائز الثالث 50,000دينار
والجوائز مقدمه من ادارة منتدى النخبة للشعر الشعبي
خادم خدام الزجيه
10-15-2011, 09:00 PM
الله الله الله الله الله الله الله
الله الله الله الله الله الله الله
يستاهل السيد هذه القصائد وقليله في حق هذه الرجل العظييم
وشكر كل الشعراء اللذين انظموا هذه القصائد في حق الليض الأبيض
ورحمك الله سيدنا الجليل
وسئل الله العلي القدير ان يوفق جمييع الشعراء بحق محمد وآل محمد ص
تحياتي ودعائي
محمد أبورغيف
10-17-2011, 02:38 AM
احسنتم بارك الله بكم وفقتم لكل
خير على النقل الطيب بوركتم وجزاكم الله الف خير
تحياتي ودعائي